جەتىسۋدا اكىمدەر سايلاۋىنا كىم قاتىسادى؟

ۇمىتكەرلەردىڭ اراسىندا عالىمدار مەن بيزنەسمەندەر جانە جۇمىسسىز وتىرعان ازاماتتار بار.

شىلدەنىڭ 25 كۇنى قازاقستاندا اۋىلدىق وكرۋگ اكىمدەرىنىڭ سايلاۋى وتەدى. الماتى وبلىسىندا بۇل سايلاۋعا قاتىسۋ ءۇشىن 279 ادام ۇسىنىس بىلدىرگەن، ولاردىڭ اراسىندا عالىمدار، مەملەكەتتىك قىزمەتكەرلەر، بيزنەس وكىلدەرى جانە ۋاقىتشا جۇمىسسىز وتىرعان ازاماتتار بار، دەپ حابارلايدى Almaty-akhamy.kz.

«ۇسىنىلعاندار اراسىندا 154 ۇمىتكەر - جۇمىس ىستەپ جۇرگەن مەملەكەتتىك قىزمەتشىلەر، 32ء-ى - كوممەرسيالىق قۇرىلىمداردىڭ وكىلدەرى، 70ء-ى - بيۋدجەتتىك ۇيىمداردىڭ قىزمەتكەرلەرى، 10-ى ۋاقىتشا جۇمىس ىستەمەيدى، 3ء-ى - قوعامدىق بىرلەستىكتەردىڭ وكىلدەرى، 6-ۋى - ءوزىن-وزى جۇمىسپەن قامتىعاندار، 3ء-ى ىشكى ىستەر جانە اسكەري سالالاردىڭ زەينەتكەرلەرى. اراسىندا عىلىمي دارەجەسى بار كانديدات تا بار»، - دەدى وبلىستىق اۋماقتىق سايلاۋ كوميسسياسىنىڭ مۇشەسى قاھارمان جاقسىلىق.

ۇمىتكەرلەردىڭ ورتاشا جاسى - 41،3 جاس.

«ورتاشا باسەكەلەستىك دەڭگەيى 3،9 ادامنان كەلەدى. ۇسىنىلعان 279 ۇمىتكەردىڭ 249-ى - ەر، 30-ى - ايەل ازاماتشالار»، – دەلىنگەن الماتى وبلىسى اكىمىنىڭ باسپا ءسوز قىزمەتى.