الماتىدا ءبىرىڭعاي ەمحانالار ستاندارتى ازىرلەنەدى

ۇلت ساۋ بولعاندا، قوعام ۇيلەسىمدى داميدى.

اعىمداعى جىلعى 16 قاراشادا مەملەكەت باسشىسىنىڭ قالا حالقىمەن كەزدەسۋدە بەرگەن تاپسىرماسى بويىنشا قالانىڭ جاڭا ستاسيونارلارىن سالۋدى جوبالاۋ جانە قولدانىستاعى ستاسيونارلاردى قايتا قۇرىلىمداۋ جوسپارلانۋدا، دەپ حابارلايدى اlmaty-akshamy.kz.

ماسەلەن، ورتالىق قالالىق كلينيكالىق اۋرۋحانانىڭ جاڭا كورپۋسىن سالۋ، قالامىزدىڭ 10 كوپسالالى اۋرۋحاناسى مەن بوساندىرۋ ۇيىمدارىن جاڭعىرتۋ سولاردىڭ قاتارىندا. بۇدان باسقا، الاتاۋ اۋدانىندا پەرزەنتحاناسى بار 500 ورىندىق كوپبەيىندى اۋرۋحانانى جوبالاۋدى باستاۋ جانە مەملەكەتتىك-جەكەشەلىك ارىپتەستىك مەحانيزمى بويىنشا مەدەۋ اۋدانىندا 200 ورىندىق كوپبەيىندى اۋرۋحانا سالۋدى باستاۋ جوسپارلانۋدا. جوبالاۋ ماقساتىنا 2023 جىلعا ارنالعان بيۋدجەت جوباسىندا 1،6 ملرد. تەڭگە كوزدەلەدى.

اكىمدىكتىڭ باستاماسى بويىنشا 2023 جىلى الماتى قالاسىنىڭ ءبىرىڭعاي ەمحانالار ستاندارتى ازىرلەنەدى، ول الدىمەن جاڭا وبەكتىلەردى سالۋ كەزىندە ەنگىزىلىپ، كەيىن جۇمىس ىستەپ تۇرعان ەمحانالارعا قولدانىلادى. 2023 جىلى 6 جاڭا ەمحانا مەن 3 وتباسى-دارىگەرلىك امبۋلاتوريانى جوبالاۋ ماقساتىنا 437،3 ملن. تەڭگە، 4 وتباسى-دارىگەرلىك امبۋلاتوريانى سالۋدى باستاۋعا 3،2 ملرد. تەڭگە كوزدەلدى.