الماتى تاۋىندا ءبىر كۇن بۇرىن جوعالعان قىز ءولى تابىلدى

الماتى تاۋىنداعى بۋتاكوۆ سارقىراماسى ماڭىنان ءبىر كۇن بۇرىن جوعالعان قىز ءولى تابىلدى، - دەپ حابارلايدى aqshamnews.kz ءتىلشىسى. 

بۇل تۋرالى الماتى قالالىق تجد باسپا ءسوز قىزمەتى مالىمدەدى.

"19 جەلتوقسان كۇنى كەشكە 102 قىزمەتىنە تۋىسى قوڭىراۋ شالىپ، قىزدىڭ تاۋلى ايماققا سنوۋبورد تەبۋگە شىعىپ، بايلانىسقا شىقپاي قالعانىن حابارلاعان"، – دەلىنگەن حابارلامادا.

اقپارات تۇسكەننەن كەيىن ىزدەۋ اۋماعىنا قۇتقارۋ قىزمەتىنىڭ كۇشتەرى، پوليسيا قىزمەتكەرلەرى، تجم روسو قۇتقارۋشىلارى، سونداي-اق ەرىكتىلەر جىبەرىلدى. وقيعا ورنىندا الماتى قالاسى مەن الماتى وبلىسى تجد باسشىلىعىمەن جەدەل شتاب قۇرىلدى.

"20 جەلتوقساندا ساعات 13:04-تە ىزدەستىرۋ-قۇتقارۋ جۇمىستارى بارىسىندا بۋتاكوۆ سارقىراماسى اۋدانىندا بۋكرەيەۆ شىڭى ماڭىندا جوعالعان قىزدىڭ دەنەسى تابىلدى"، – دەپ ناقتىلادى باسپا ءسوز حابارلاماسىندا.

قۇتقارۋشىلار ءمايىتتى تەڭىز دەڭگەيىنەن 2 100 مەتر بيىكتەن بۋتاكوۆ شاتقالىنداعى باقىلاۋ-قۇتقارۋ بەكەتىنە دەيىن ءتۇسىرىپ، كەيىن پوليسيا قىزمەتكەرلەرىنە تاپسىردى.

"سوت-مەديسينالىق ساراپتاما تاعايىندالدى. سوڭعى سايكەستەندىرۋ بارلىق قاجەت ساراپتاما اياقتالعاننان كەيىن جۇرگىزىلەدى"، – دەلىنگەن حابارلامادا.

ىزدەستىرۋ-قۇتقارۋ جۇمىستارىنا الماتى قالاسى، الماتى وبلىسى تجد، قۇتقارۋ قىزمەتى، تجم روسو، تجم اپات مەديسيناسى ورتالىعى جانە ەرىكتىلەردەن 73 ادام، 10 تەحنيكا، 5 ۇشقىشسىز ۇشۋ اپپاراتى، 3 كينولوگيالىق ەسەپتوپ جۇمىلدىرىلدى.