قازاقستاننىڭ عىلىم جانە جوعارى ءبىلىم مينيسترلىگى دوكتورانتۋراعا ءتۇسۋدىڭ ۇلگىلىك ەرەجەلەرىنە وزگەرىستەر ەنگىزدى. جاڭا ەرەجەلەر شىعارماشىلىق جانە تىلدىك باعىتتار بويىنشا تۇسۋشىلەر ءۇشىن تالاپتاردى ايتارلىقتاي جەڭىلدەتتى. بۇل تۋرالى ءماجىلىس دەپۋتاتى اسحات ايماعامبەتوۆ مالىمدەدى، - دەپ حابارلايدى aqshamnews.kz ءتىلشىسى.
اعىلشىن ءتىلى سەرتيفيكاتى مىندەتتى ەمەس ماماندىقتار
بۇعان دەيىن ماماندىعىنا قاراماستان، بارلىق ۇمىتكەردەن اعىلشىن ءتىلىن ءبىلۋ تۋرالى سەرتيفيكات (مىسالى، IELTS) تالاپ ەتىلەتىن. دەپۋتاتتىڭ ايتۋىنشا، قازىرگىدەي GPT جانە Gemini سياقتى نەيروجەلىلەر دامىعان زاماندا بۇل كەدەرگىنى الىپ تاستاۋ – قيسىندى قادام.
ءمينيستردىڭ №490 بۇيرىعىنا سايكەس، ەندى مىنا ءبىلىم بەرۋ باعدارلامالارى بويىنشا شەت ءتىلىن ءبىلۋ سەرتيفيكاتى تالاپ ەتىلمەيدى:
- D005 – دەنە شىنىقتىرۋ مۇعالىمدەرىن دايارلاۋ؛
- D006 – مۋزىكا مۇعالىمدەرىن دايارلاۋ؛
- D017 – قازاق ءتىلى مەن ادەبيەتى مۇعالىمدەرىن دايارلاۋ؛
- D018 – ورىس ءتىلى مەن ادەبيەتى مۇعالىمدەرىن دايارلاۋ.
«قازاق فيلولوگياسى نەمەسە مۋزىكا سالاسىنداعى تالانتتى زەرتتەۋشىلەر تەك سەرتيفيكاتى بولماعاندىقتان دوكتورانتۋراعا تۇسە الماي كەلدى. ءبىز ديففەرەنسيالدى ءتاسىلدى قولدانۋدى ۇسىندىق»، — دەپ جازدى ايماعامبەتوۆ.
ەسسە ورنىنا Research Proposal كەلەدى
تاعى ءبىر ماڭىزدى جاڭالىق – ءتۇسۋ كەزىندەگى ەسسە جازۋ تالابى جويىلۋى مۇمكىن. ونىڭ ورنىنا ۇمىتكەردىڭ ناقتى عىلىمي الەۋەتىن باعالاۋ ءۇشىن Research Proposal (زەرتتەۋ جوسپارى) ەنگىزىلمەك.
بۇل نورما 2026-2027 وقۋ جىلىنان باستاپ ەنگىزىلەدى دەپ جوسپارلانۋدا. زەرتتەۋ جوسپارىن باعالاۋعا تاۋەلسىز ساراپشىلار تارتىلادى.
الداعى ۋاقىتتا نە وزگەرۋى مۇمكىن؟
دەپۋتات سونىمەن قاتار ءبىرقاتار جۇيەلى ۇسىنىستىڭ ءالى قارالىپ جاتقانىن ايتتى. ولاردىڭ ىشىندە:
- شىعارماشىلىق باعىتتار ءتىزىمىن كەڭەيتۋ؛
- تىلدىك ەمتيحان تاپسىرۋ مەرزىمىن وقۋدىڭ سوڭىنا اۋىستىرۋ؛
- اكادەميالىق ادالدىقتى كۇشەيتۋ جانە Scopus بازاسىنداعى جاريالانىمدارعا قويىلاتىن تالاپتاردى ارتتىرۋ.
قازىرشە مينيسترلىك تىلدىك جانە شىعارماشىلىق باعىتتاعى پەداگوگتار ءۇشىن نەگىزگى «كەدەرگىنى» الىپ تاستادى، ءبىراق دوكتورانتۋرا باعدارلامالارىن جەتىلدىرۋ جۇمىستارى ءالى دە جالعاسا بەرمەك.