قازگيدرومەت 22 جەلتوقساندا اۋا رايىنا بايلانىستى ءبىرقاتار وڭىردە ەسكەرتۋ جاريالادى.
سينوپتيكتەردىڭ بولجامى بويىنشا، الداعى دۇيسەنبىدە ەلدىڭ باسىم بولىگىندە كۇن رايى بۇزىلادى، - دەپ حابارلايدى Aqshamnews.kz.
الماتى جانە الماتى وبلىسىنىڭ وڭتۇستىگى مەن تاۋلى ايماقتارىندا كوكتايعاق، تۇمان بولادى. قونايەۆ پەن الماتى قالالارىندا دا تۇندە كوكتايعاق بولىپ، تۇمان تۇسەدى.
سولتۇستىك قازاقستاندا قىس قاھارىنا مىنەدى. پەتروپاۆلدا جانە وبلىستىڭ سولتۇستىگى مەن شىعىسىندا قار جاۋىپ، بوران سوعادى. جەلدىڭ ەكپىنى سەكۋندىنا 23-28 مەترگە دەيىن جەتەدى.
كوكشەتاۋدا جانە اقمولا وبلىسىنىڭ باسىم بولىگىندە قار جاۋىپ، بوران بولادى. جەلدىڭ ەكپىنى 25 م/س دەيىن كۇشەيەدى.
شىعىس قازاقستان جانە اباي وبلىسىندا، سەمەي مەن وسكەمەندە جاياۋ بوران سوعىپ، تۇمان تۇسەدى. وڭىرلەردە قار جاۋۋى ىقتيمال، جەلدىڭ ەكپىنى 23 م/س دەيىن جەتەدى.
باتىس قازاقستاندا جانە ورالدا قار ارالاس جاڭبىر جاۋىپ، جاياۋ بوران مەن كوكتايعاق بولادى. تۇمان ءتۇسۋى دە مۇمكىن.
وڭتۇستىك وڭىرلەردە، قىزىلوردا، تاراز جانە جامبىل وبلىستارىندا تۇمان مەن كوكتايعاق بولادى. تاۋلى ايماقتاردا بوران سوعادى.
ورتالىق جانە باسقا ايماقتاردا، قاراعاندى، ۇلىتاۋ، پاۆلودار، قوستاناي جانە ماڭعىستاۋ وبلىستارىندا تۇمان مەن كوكتايعاق بولادى. اقتاۋدا كۇندىز كوكتايعاق بولىپ، جەل كۇشەيەدى. جەتىسۋ وبلىسىندا تاۋلى ايماقتاردا قار جاۋىپ، الاكول ماڭىندا قاتتى جەل سوعادى.
استانادا 22 جەلتوقساندا وڭتۇستىك-باتىستان سوققان جەلدىڭ ەكپىنى 15-20 م/س بولادى.
تۇركىستان وبلىسىنىڭ وڭتۇستىگىندە، باتىسىندا، تاۋلى اۋداندارىندا كوكتايعاق، تۇمان بولادى دەپ بولجانادى. شىمكەنتتە 22 جەلتوقساندا تۇندە جانە تاڭەرتەڭ كوكتايعاق، تۇمان بولادى. تۇركىستاندا 22 جەلتوقساندا تۇمان ءتۇسۋ ىقتيمالدىلىعى جوعارى.
سينوپتيكتەر جولعا شىعاردا اباي بولۋ كەرەگىن ەسكەرتتى.