الماتى قالاسىندا جىلدى قورىتىندىلاعان "Beles 2025 – جىلدىڭ سپورت جەتىستىكتەرى" فەستيۆالى ۇيىمداستىرىلدى. بۇل ماڭىزدى سپورتتىق-بۇقارالىق ءىس-شاراعا قالا تۇرعىندارى، اۋەسقويلار مەن سالاۋاتتى ءومىر سالتىن ۇستاناتىن بەلسەندى ازاماتتار قاتىستى.
فەستيۆالدىڭ نەگىزگى ماقساتى — سالاۋاتتى ءومىر سالتىن ناسيحاتتاۋ، بۇقارالىق سپورتتى دامىتۋ جانە قالا تۇرعىندارىن دەنە شىنىقتىرۋعا تۇراقتى تۇردە تارتۋ بولدى. فەستيۆال اياسىندا قاتىسۋشىلار فيزيكالىق مۇمكىندىگىن سىناپ، وسى جىلداعى سپورت سالاسىنداعى جەتىستىكتەرىن قورىتىندىلادى.
جارىسقا كاسىبي سپورتشىلارمەن قاتار اۋەسقويلار دا قاتىستى. سونىمەن بىرگە بالالارعا، جاسوسپىرىمدەرگە جانە مۇمكىندىگى شەكتەۋلى جاندارعا ارنالعان ارنايى تاپسىرمالار ۇسىنىلدى.
"Beles 2025" سپورت فەستيۆالى – بۇل جىل بويى ەل نامىسىن قورعاپ، حالىقارالىق ارەنادا قازاقستاننىڭ اتىن شىعارعان سپورتشىلارعا كورسەتىلگەن قۇرمەتتىڭ بەلگىسى. بۇل سپورتتىق ءىس-شارا جىلدىڭ قورىتىندىسىن شىعاراتىن ماڭىزدى مەجەگە اينالدى. فەستيۆال اياسىندا 12 سپورتتىق لوكاسيا ۇيىمداستىرىلدى. ءار ورىندا قاتىسۋشىلار ارنايى فۋنكسيونالدىق جاتتىعۋ ورىنداپ، جيناعان ۇپايىن مەدالعا ايىرباستاۋ مۇمكىندىگىنە يە بولدى"، - دەدى فەستيۆالدىڭ ماڭىزىنا توقتالعان "قوعامدىق پىكىر" سپورت ليگاسىنىڭ وكىلى ەۆگەنيي شامراي.
ونىڭ ايتۋىنشا، فەستيۆالدە ءار سپورتتىق ايماقتا ايلىق فورماتتا جاسالعان ارنايى باننەرلەر قويىلدى. باننەرلەر گازەت ستيلىندە بەزەندىرىلىپ، ءبىر جىل ىشىندە قازاقستان سپورتشىلارىنىڭ الەمدىك ارەناداعى جەتىستىكتەرىن كورسەتەدى.
"ءار اي بەلگىلى ءبىر سپورت تۇرىنە ارنالدى: مىسالى، قاڭتار – بوكس، اقپان – اۋىر اتلەتيكا جانە ت.ب. سپورت سالالارى. ال قورىتىندى - ون ەكىنشى باننەردە قازاقستان سپورتشىلارىنىڭ ءبىر جىلدا جەڭىپ العان جالپى مەدال سانى مەن حالىقارالىق رەيتينگتەگى ورنى كورسەتىلدى.
فەستيۆالدىڭ باستى ماقساتى – بۇقارالىق سپورتتى دامىتۋ جانە تۇرعىنداردى سالاۋاتتى ءومىر سالتىنا تارتۋ"، - دەدى ەۆگەنيي شامراي.
"بۇل ءىس-شارا مەن ءۇشىن ۇلكەن موتيۆاسيا بولدى. وسىنداي جارىستار جاستاردى سپورتقا باۋلىپ، مۇمكىندىگىمدى اشۋعا كومەكتەسەدى دەپ ويلايمىن. كەلەسى جىلى دا مىندەتتى تۇردە قاتىسىپ، بۇگىنگى ناتيجەمدى جاقسارتقىم كەلەدى"، - دەيدى قاتىسۋشى ءىلياس كانەباي.