الماتى قالاسىندا جاڭا جىل مەرەكەسى قارساڭىندا قىلقانجاپىراقتى اعاشتاردى قورعاۋعا باعىتتالعان رەسپۋبليكالىق جەدەل-پروفيلاكتيكالىق "شىرشا"ءىس-شاراسى باستالدى.
اتالعان شارا 15–31 جەلتوقسان ارالىعىندا وتكىزىلىپ، جاس كوشەتتەردى زاڭسىز كەسۋ، دايىنداۋ، تاسىمالداۋ جانە ساتۋدىڭ الدىن الۋعا باعىتتالعان. مەرەكەلىك كەزەڭدە قىلقانجاپىراقتى اعاشتاردى قورعاۋعا ەرەكشە ءمان بەرىلەدى.
وسى ماقساتتا پوليسيا قىزمەتكەرلەرى مەن ۋاكىلەتتى ورگانداردىڭ قاتىسۋىمەن بىرلەسكەن رەيدتىك توپتار قۇرىلىپ، اعاش وسەتىن اۋماقتاردا، ساۋدا ورىندارىندا جانە اۆتوجولداردا تۇراقتى پاترۋلدەۋ جۇمىستارى جۇرگىزىلۋدە. زاڭسىز دايىنداۋ نەمەسە ساتۋ دەرەكتەرى انىقتالعان ءاربىر جاعدايدا ءتيىستى تەكسەرۋ جۇرگىزىلىپ، اعاشتاردىڭ شىعۋ تەگى جان-جاقتى انىقتالادى.
- مەرەكەلەر قارساڭىندا قىلقانجاپىراقتى اعاشتاردى قورعاۋ - باستى نازارداعى مىندەتتەردىڭ ءبىرى. جاسىل جەلەكتى ساقتاۋ باعىتىنداعى جۇمىستار جۇيەلى تۇردە اتقارىلىپ كەلەدى. وسى رەتتە قالا تۇرعىندارى مەن قوناقتارىن تابيعاتتى قورعاۋعا بەلسەندى اتسالىسۋعا شاقىرامىز، - دەپ اتاپ ءوتتى الماتى قالاسى پوليسيا دەپارتامەنتى قوعامدىق قاۋىپسىزدىك باسقارماسىنىڭ باستىعى اسحات قۇلبايەۆ.
الماتى قالاسى پوليسيا دەپارتامەنتى قىلقانجاپىراقتى اعاشتاردى قورعاۋ جانە ساقتاۋ جۇمىستارى تۇراقتى تۇردە جۇرگىزىلەتىنىن ەسكە سالىپ، قالا تۇرعىندارى مەن قوناقتارىن اعاشتاردى زاڭسىز كەسۋ، ءبۇلدىرۋ نەمەسە جويۋ فاكتىلەرى تۋرالى "102" ءنومىرى ارقىلى پوليسياعا حابارلاۋعا شاقىرادى.