تەاتر جانە كينو ونەرىنىڭ اڭىزى ءاسانالى ءاشىموۆ ومىردەن ءوتتى

قازاق كينوسىنىڭ اڭىزى ءاسانالى ءاشىموۆ قايتىس بولدى، - دەپ حابارلايدى aqshamnews.kz ءتىلشىسى.

قايعىلى حاباردى رەداكسياعا مۇحتار اۋەزوۆ اتىنداعى قازاق ۇلتتىق دراما تەاترىنىڭ باسپا ءسوز قىزمەتىنىڭ وكىلدەرى راستادى. 

ءاسانالى ءاشىموۆ تۋرالى نە بەلگىلى؟

ءاسانالى ءاشىم ۇلى ءاشىموۆ (1937 جىلى 8 مامىردا جامبىل وبلىسى، سارىسۋ اۋدانى، جايىلمادا تۋعان) – كەڭەستىك جانە قازاقستاندىق كينو جانە تەاتر اكتەرى، كينو جانە تەاتر رەجيسسەرى، تەاتر پەداگوگى، پروفەسسور. قازاق كسر حالىق ءارتيسى (1976)، كسرو حالىق ءارتيسى (1980). قازاق كسر مەملەكەتتىك سىيلىعىنىڭ لاۋرەاتى (1973)، كسرو مەملەكەتتىك سىيلىعىنىڭ لاۋرەاتى (1974). قازاقستان تەاترلار اسسوسياسياسىنىڭ پرەزيدەنتى. مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كوركەمدىك جەتەكشىسى. قازاقستاننىڭ ەڭبەك ەرى (2017). قاتال سوعىس جىلدارى وتكەن بالالىق شاعى تۋرالى وسىلاي دەيدى: – العاشقى قار جاۋعانشا جالاڭ اياق ءجۇردىم. ءبىر كۇنى ساباق كەزىندە قالىڭ قار جاۋعان ەدى. بارلىق سىنىپتاستارىمدى اتا-انالارى ۇيلەرىنە الىپ كەتتى. ال مەن سۋىق ساز مەكتەپتە جالعىز قالدىم. ول كەزدە توعىز جاستا ەدىم. ءتۇنى بويى قاتتى قورىققانىم سونشالىق، تاڭەرتەڭ مەكتەپتەن ون جاسقا ەسەيىپ شىققانداي بولدىم.

ساحناداعى نەگىزگى رولدەرى

مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترى ساحناسىندا: م. اۋەزوۆتىڭ "ابايىندا" كەرىم، "ەڭلىك-كەبەگىندە" كەبەك، "قارا قىپشاق قوبىلاندىسىندا" ايشۋاق، "تاڭعى جاڭعىرىعىندا" جاراسباي، ع. مۇسىرەپوۆتىڭ "قوزى كورپەش-بايان سۇلۋىندا" قودار، ق. مۇحامەدجانوۆ، ش. ايتماتوۆتىڭ "كوكتوبەدەگى كەزدەسۋىندە" يوسيف تاتايەۆيچ، شەكسپيردىڭ "يۋليي سەزارىندە" يۋليي سەزار، م. ءفريشتىڭ "دون جۋاننىڭ دۋمانىندا" دون جۋان، ءا. نۇرپەيىسوۆتىڭ "قان مەن تەرىندە" ەلامان، ي. ۆوۆنيانكونىڭ "اپاتىندا" باس كەيىپكەر، تاعى دا باسقا كوپتەگەن قويىلىمدا كورنەكتى اكتەردىڭ ايشىقتى ونەگەسى مەن ورنەكتى ءىزى جاتىر. ال، ا. ءاشىموۆتىڭ قارا شاڭىراق ساحناسىنداعى سوڭعى كۇردەلى جۇمىسى گ. گاۋپتماننىڭ "ىمىرتتاعى ماحاببات" دراماسىنداعى دوكتور كلاۋزەن. جانە ت.ب كوپتەگەن بەينەلەردى سومدادى.