قالادا مۇگەدەك ادامداردىڭ سانى جىل سايىن ورتا ەسەپپەن 3% ارتۋدا.
1350 مۇگەدەك ادامدى جۇمىسپەن قامتۋ ءۇشىن 775 ملن تەڭگە ءبولۋ جوسپارلانۋدا. بۇل تۋرالى شاھار جەتەكشىسى ەربولات دوسايەۆ الماتىنىڭ قالاسىنىڭ 2023-2025 جىلدارعا ارنالعان بيۋدجەت جوباسىن قاراۋ بارىسىندا ايتتى، دەپ حابارلايدى Almaty-akshamy.kz.
ەربولات دوسايەۆتىڭ ايتۋىنشا، حالىقتىڭ الەۋمەتتىك وسال توپتارىنا جانە ەرەكشە قاجەتتىلىكتەرى بار ادامدارعا جان-جاقتى قولداۋ كورسەتۋ قالانىڭ باسىم مىندەتى بولۋى ءتيىس.
«بۇگىندە حالىقتىڭ 240،5 مىڭ وسال توبىنا 26 ملرد تەڭگەگە الەۋمەتتىك قولداۋ كورسەتىلدى. قالامىزدا مۇگەدەك ادامداردىڭ سانى جىل سايىن ورتا ەسەپپەن 3 پروسەنتكە ارتۋدا، ال بالالار اراسىندا بۇل كورسەتكىش 6،8%-كە وسۋدە»، - دەدى ەربولات دوسايەۆ.
مۇگەدەكتىكتىڭ الدىن الۋ ماقساتىندا 2023 جىلى جىل سايىن 950 ماماندى وقىتا وتىرىپ، 600 ملن.تەڭگە سوماسىنا ەرتە ارالاسۋ ورتالىعىن قۇرۋ بويىنشا پيلوتتىق جوبانى ىسكە قوسۋ جوسپارلانۋدا.
«كەلەسى جىلدان باستاپ مەنىڭ باستامام بويىنشا الماتى قالاسىنىڭ اكىمدىگى 200 مۇگەدەك بالانى ەلەكتر جەتەگى بار جوعارى ساپالى جەكە كرەسلو–اربالارمەن قامتاماسىز ەتۋدىڭ ارنايى باعدارلاماسىن ىسكە اسىرۋدى، سونداي-اق 1،4 ملرد. تەڭگە سوماسىنا 170 ادامدى جاڭا تەحنولوگيالار بويىنشا پروتەزدىك-ورتوپەديالىق قۇرالدارمەن جانە سۇيەك وتكىزگىشتىگى بار ەستۋ اپپاراتتارىمەن، سويلەۋ پروسەسسورلارىمەن قامتاماسىز ەتۋدى جوسپارلاپ وتىر»،- دەدى قالا اكىمى.
ونىڭ ايتۋىنشا، بۇل شارا الەۋمەتتىك قىزمەتتەر پورتالىندا جوق وڭالتۋدىڭ جوعارى تەحنولوگيالىق قۇرالدارىن تولىقتىرۋعا جانە وسى ماقساتقا قارجىلاندىرۋ كولەمىن 8،2 ملرد. تەڭگەگە دەيىن جەتكىزۋگە مۇمكىندىك بەرەدى.