ۇلى دالا ءداستۇرى جاستاردىڭ قالالىق مادەنيەتىنە قالاي ەنەدى؟ الماتىلىق ماكسيم سوروكين ەرەكشە جوبا ويلاپ تاپتى. ول بەلسەندى جاستاردى مادەني قۇندىلىققا باۋلىپ، قازاق حالقىنىڭ داستۇرىمەن تانىستىرا وتىرىپ، ءداستۇرلى بۇيىمدار بەينەلەنگەن بوردتار جاسايدى.
ءبىر قۋانتارلىعى، كورپەشەلەر مەن ءداستۇرلى كيىز تاپىشكەلەرى بار تاقتالار جاس ۇرپاقتىڭ كوڭىلىنەن شىقتى. ەكسترەمالدى سپورتشىلاردىڭ وزدەرى ۇلتتىق تاقتالاردى جىلى قابىلداعان. ولار شەت ەلدەردە وتەتىن جارىستاردا تەك سپورتتىق شەبەرلىكتى عانا ەمەس، سونىمەن قاتار قازاق جەرىنىڭ ءداستۇرىن، مادەنيەتىن پاش ەتۋگە بولاتىنىن تىلگە تيەك ەتتى.
– ديزاينعا قاتىستى يدەيالار وتە كوپ. ءبىزدىڭ ءبىرىنشى توپتامامىز 90-شى جىلداردىڭ ستيلىنە سايكەس جاسالدى. ءبىز ول كەزدە تانىمال Sony Walkman ويناتقىشىنا، اۋديوكاسسەتالارعا جانە ويىن پريستاۆكالارىنا سىلتەمەلەر جاسادىق. ەكىنشى توپتامادا ەتنيكالىق جانە قالالىق موتيۆتەر پايدا بولدى. ءبىز بۇنى الماتى مەن قازاقستاننىڭ مادەنيەتىنە دەگەن سۇيىسپەنشىلىگىمىز بەن قۇرمەتىمىزدى كورسەتۋدىڭ تاماشا مۇمكىندىگى دەپ بىلەمىز، – دەدى جوبا ۇيىمداستىرۋشىسى الەكسەي ەفيمچەنكو.
بارلىق تاقتا كانادالىق ۇيەڭكىدەن جاسالعان. ادەتتە تاقتا تىعىز باسىلعان جانە بىر-بىرىنە جەلىمدەلگەن جەتى قاباتتان تۇرادى. ازىرگە قازاقستاندا تاقتالار ءوندىرىسى جولعا قويىلماعان، ويتكەنى ءتيىستى زاۋىتتار جوق. الەم ەلدەرىندە دە ولار كوپ ەمەس. ال الماتى بوردتارى سياقتى بىرەگەي ديزاين الەمنىڭ ەش جەرىندە جوق كورىنەدى.