ترەناجەر باعاسى اسپانداپ تۇر

ءقازىر الماتى مەن ەلوردادا، وبلىس ورتالىقتارىندا فيتنەس-كلۋب، سپورت زالدارى از ەمەس. ءبىراق مىنا الەمدىك پاندەميا، داعدارىس، كۇندەلىكتى كۇيبەڭ تىرلىك پەن جۇمىسباستىلىقتى ەسكەرىپ، جۇرتشىلىقتىڭ ءتان ساۋلىعىنا جاپپاي دەن قويۋىنا مۇرشا بەرىپ جاتقان بىردە-بىر سپورت زالى جوق. ولار الدەقاشان قالتاسى قالىڭدارعا عانا قىزمەت كورسەتۋدىڭ جولىنا ءتۇسىپ كەتتى.

ماسەلەن، ءبىر عانا الماتىدا ءىرىلى-ۇساقتى 70-كە جۋىق فيتنەس كلۋبتار، ساۋىقتىرۋ ورتالىقتارى بار. الايدا، ولاردىڭ باعاسى، قىزمەت كورسەتۋ قۇنى وتە قىمبات.

ترەناجەر زالىنا اپتاسىنا ءۇش رەت بارساڭىز، ايىنا 20 مىڭ تەڭگە تولەيسىز. باسسەيندە ءجۇزۋدىڭ ءبىر ايعا ارنالعان ارزان ابونەمەنتىنىڭ ءوزى 20–25 مىڭ تۇرادى. ءبىراق كەز كەلگەن اتا-انا بالاسىن ترەناجەر زالدارعا جىبەرەتىن بولسا، ونىڭ ءوز بەتىمەن دايىندالعانىن ەمەس، كاسىبي ينسترۋكتورمەن بىرگە جاتتىققانىن قالايدى. ويتكەنى، ونسىز قانشا اي شۇعىلدانسا دا، ناتيجە شىعارۋ قيىن. جاتتىعۋ زالدارىنىڭ ءوزى دە ينسترۋكتورلارمەن دەربەس اينالىسۋعا كەڭەس بەرەدى.

الايدا، وعان تاعى دا قوسىمشا اقى قوسىلادى. ءار ينسترۋكتور ءوز قىزمەتى ءۇشىن كەم دەگەندە 10 مىڭ تەڭگە الادى. ەگەر ول سپورت شەبەرى نەمەسە ءتۇرلى سايىستاردان چەمپيون اتاعىن السا، ونىڭ قىزمەت اقىسى قىمبات بولادى. بۇل رەتتە كاسىبي ماماننىڭ جاتتىعۋىنا توپ بولىپ قاتىسساڭىز، ءسال ارزانداۋ تۇسەدى. ال ەگەر جەكە ءوزىن عانا دايىندايتىن بولسا، ونىڭ قۇنى جوعارى تۇرادى. بۇل تۇستا ترەناجەر زالدارىنىڭ ءبارى جەكە بولعاندىقتان، بالالارعا ەشقانداي جەڭىلدىك قاراستىرىلماعان. كوپ بالالى وتباسى بولسىن، مۇگەدەك بالا بولسا دا – اقى بارىنە بىردەي.