مەملەكەت باسشىسىنىڭ باستاماسىمەن جۇزەگە اسىپ جاتقان «تازا قازاقستان» جالپىۇلتتىق اكسياسى اياسىندا حالىقتىڭ ەكولوگيالىق مادەنيەتىن قالىپتاستىرۋ، تابيعاتتىڭ تازالىعىن ساقتاۋ جونىندە اۋقىمدى جۇمىستار اتقارىلىپ جاتقانى بەلگىلى. وسى باعىتتا بۇگىن اباي ۋنيۆەرسيتەتى ىلە-الاتاۋ مەملەكەتتىك ۇلتتىق تابيعي پاركىمەن ىنتىماقتاستىق تۋرالى مەموراندۋمعا قول قويدى.
اباي اتىنداعى قازۇپۋ باسشىلىعى ىلە-الاتاۋ مەملەكەتتىك ۇلتتىق تابيعي پاركىنىڭ باس ديرەكتورى احمەتوۆ ەلنۇر مۇحامەدجانۇلىمەن كەزدەستى. كەزدەسۋ بارىسىندا «تازا قازاقستان» جوباسى اياسىندا بىرلەسە اتقارىلاتىن جۇمىستار جايى ايتىلىپ، ورتاق ۇسىنىستار مەن جوسپارلار تالقىلاندى. جالپىۇلتتىق جوبا شەڭبەرىندە ەكىجاقتى ارىپتەستىكتى ارتتىرىپ، جاستار اراسىندا ەكولوگيالىق تازالىقتى ناسيحاتتاۋعا نازار اۋدارىلدى.
تالقىلاۋ بارىسىندا ۋنيۆەرسيتەت باسشىلىعى «تازا قازاقستان» جوباسى بويىنشا قولعا الىنعان ءبىلىم الۋشىلار مەن وقىتۋشى-پروفەسسورلار قۇرامىنىڭ ەكولوگيالىق عىلىمي زەرتتەۋلەرىنە توقتالدى. ولاردىڭ باسىم كوپشىلىگى ەلىمىز ءۇشىن عانا ەمەس، جاھاندىق ەكولوگيا ءۇشىن ماڭىزدى دەسەك بولادى. قوس تاراپ ادامزات ءۇشىن ماڭىزدى تاقىرىپ اياسىندا عىلىمي-تاجىريبەلىك زەرتتەۋ جۇمىستارىن الداعى ۋاقىتتا بىرلەسە اتقارۋعا ۋاعدالاستى.
ۇلتتىق پاركتى بولاشاق مامانداردى دايارلاۋدا تاجىريبە الاڭىنا اينالدىرۋ ماسەلەلەرى قوزعالدى. تابيعي نىساندار، بيوالۋانتۇرلىلىك پەن ەكوجۇيەلەرگە قاتىستى مالىمەتتەردى تالداۋ ارقىلى ستۋدەنتتەردىڭ زەرتتەۋ قابىلەتتەرىن ارتتىرۋ، بىرلەسكەن وقۋ قۇرالدارى مەن ادىستەمەلىك ەڭبەكتەر ازىرلەۋ جايى ءسوز بولدى. ۇلتتىق پاركتىڭ دەرەكتەر قورىن عىلىمي اينالىمعا ەنگىزىپ، وقۋ ۇدەرىسىندە پايدالانۋ ماسەلەسى دە نازاردان تىس قالعان جوق.
سونىمەن قاتار، ىلە-الاتاۋ ۇلتتىق پاركىنىڭ تۋريستىك الەۋەتىن ارتتىرۋعا باعىتتالعان جوبالار دا قارالدى. اتاپ ايتقاندا، ستۋدەنتتەردىڭ جاڭا تەحنولوگيالاردى پايدالانا وتىرىپ، ەكولوگيالىق، تانىمدىق جانە تۋريستىك باعىتتاعى باستامالاردى جۇزەگە اسىرۋ مۇمكىندىگى قاراستىرىلدى. مۇنداي سيفرلىق جوبالار جاستاردىڭ قىزىعۋشىلىعىن تۋدىرىپ، ۇلتتىق پارك قىزمەتىن كەڭىرەك ناسيحاتتاۋعا سەپتىگىن تيگىزەدى.
كەزدەسۋ سوڭىندا تاراپتار ورتاق شەشىمگە كەلىپ ىنتىماقتاستىق تۋرالى مەموراندۋمعا قول قويدى. بۇل كەلىسىم الداعى ەكىجاقتى بىرلەسكەن جۇمىستاردىڭ بەرىك نەگىزىنە اينالماق.