جۋرناليست دياس نۇراقىن Facebook-پاراقشاسىندا شونجىدا ءىرى-قارا سويعان ازاماتتاردىڭ قولىنا جارا شىعىپ، اۋرۋحاناعا تۇسكەنى تۋرالى مالىمدەگەن بولاتىن. ول اۋرۋ وشاعىن انىقتاۋ ءۇشىن ۆەتەرينارلار سىناما الىپ، زەرتحاناعا جولدانعانى تۋرالى جازدى. الماتى وبلىسى سانيتارلىق-ەپيدەميولوگيالىق باقىلاۋ دەپارتامەنتى وكىلدەرى بۇل جاعدايعا قاتىستى پىكىر ءبىلدىردى، دەپ حابارلايدى aqshamnews.kz.
الماتى وبلىسى سانيتارلىق-ەپيدەميولوگيالىق باقىلاۋ دەپارتامەنتى وكىلدەرى بۇل جاعدايدى راستاپ، 4 ادام ءسىبىر جاراسىن جۇقتىرۋى مۇمكىن ەكەنىن ايتتى.
قازاقستان رەسپۋبليكاسى اۋىل شارۋاشىلىعى مينيسترلىگى ۆەتەرينارلىق باقىلاۋ جانە قاداعالاۋ كوميتەتىنىڭ الماتى وبلىسى بويىنشا اۋماقتىق ينسپەكسياسىنىڭ مالىمەتىنشە، مال ۆەتەرينارلىق قىزمەتكە حابارلاماستان سويىلعان.
"اۋرۋدىڭ پايدا بولۋ سەبەپتەرىن انىقتاۋ ءۇشىن ۆەتەرينارلىق ينسپەكسيا سەبد، پد جانە وبلىس اكىمدىگىمەن بىرلەسىپ ناۋقاستاردىڭ ۇيىندەگى شيكىزات پەن سويۋ ونىمدەرىنەن، سونداي-اق مال سويۋ ورنىنان توپىراق سىنامالارى الىندى"، - دەلىنگەن حابارلامادا.
رەسپۋبليكالىق ۆەتەرينارلىق زەرتحانا بيولوگيالىق تالداۋ ميكروسكوپياسى مەن پتر كومەگىمەن جينالعان ماتەريالدارعا زەرتتەۋلەر جۇرگىزدى. باكتەريولوگيالىق زەرتتەۋلەردىڭ ناتيجەسى ءالى دايىن بولعان جوق.
"بيىل 12 تامىزدا بۇل ەلدى مەكەندەگى مال ءسىبىر جاراسىنا قارسى ەكپە العان. ءقازىر ەلدى مەكەندە جەكە شارۋاشىلىقتارداعى ءىرى-قارا مالدى وقشاۋلاۋ جانە كارانتينگە جابۋ جۇمىستارى جۇرگىزىلدى. ماماندار مالدى كۇندەلىكتى تەكسەرۋدەن وتكىزەدى، اۋرۋدىڭ كلينيكالىق بەلگىلەرى انىقتالماعان. بارلىق قاجەت ۆەتەرينارلىق-سانيتارلىق شارا قازىرگى الگوريتمگە سايكەس جۇرگىزىلىپ جاتىر"، - دەپ جازىلعان حابارلامادا.