ەكونوميكانىڭ ءوسىمىن قامتاماسىز ەتۋ جانە ينۆەستيسيالىق تارتىمدىلىعىن ارتتىرۋ تۇرعىسىنان العاندا كاسىپتىك ءبىلىم بەرۋ سالاسىنا رەفورما جاساۋ – بۇگىندە ايرىقشا وزەكتى ماسەلە.
پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋ جاساعان پرەزيدەنت قاسىم-جومارت توقايەۆ الداعى جىلدى جۇمىسشى ماماندىقتارى جىلى دەپ جاريالادى، سونداي-اق تەحنيكالىق جانە كاسىبي ءبىلىم بەرۋ جۇيەسىن رەفورمالاۋ قاجەتتىگىنە نازار اۋدارتتى. «ءبىز جۇمىسشى ماماندىقتارىن دارىپتەۋ ارقىلى قوعامدا ەڭبەكقور جانە ناعىز مامان بولۋ يدەياسىن ناسيحاتتايمىز» دەدى مەملەكەت باسشىسى.
پرەزيدەنت ادال ءارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى، سىيلى بولۋى كەرەك ەكەندىگىن ايتتى. بۇل «ادال ازامات – ادال ەڭبەك – ادال تابىس» قاعيداتىنا تولىق ساي كەلەدى. قاسىم-جومارت توقايەۆ ءبىزدىڭ قوعامدا ەڭبەكقورلىق، كاسىبيلىك سياقتى قاسيەتتەر وتە جوعارى باعالانۋعا ءتيىس، ءوز كاسىبىن جەتىك مەڭگەرگەن ماماندار ۇلت ساپاسىن ارتتىرادى دەپ ەسەپتەيدى.
«جۇمىستىڭ جامانى جوق، كەز كەلگەن ەڭبەك – ءقادىرلى. ەڭ باستىسى، اركىم جاۋاپكەرشىلىكتى تەرەڭ سەزىنىپ، ءوز مىندەتىن ساپالى اتقارۋعا ءتيىس. سوندا عانا ەلىمىز دامۋدىڭ سارا جولىنا تۇسەدى. حالقىمىزدا «جۇمىستىڭ كوزىن تاپقان بايلىقتىڭ ءوزىن تابادى» دەگەن ءسوز بار. كاسىبىنە ادال ءارى جاۋاپكەرشىلىكپەن قاراعان ادام قاشاندا لايىقتى باعاسىن الادى. بۇل تۇسىنىكتى قوعام ساناسىنا ءسىڭىرۋ قاجەت. ازاماتتارعا قۇرمەتتى اتاق بەرۋدەگى تۇپكى ماقساتىمىز دا – وسى. بۇعان دەيىن مۇعالىمدەرگە، دارىگەرلەرگە جانە مادەنيەت قايراتكەرلەرىنە وسىنداي اتاقتار بەرىلە باستادى. بۇل – وتە جاقسى باستاما، ونىڭ اياسىن كەڭەيتۋ كەرەك»، - دەدى پرەزيدەنت.
مەملەكەت باسشىسى ەكونوميكانى بىلىكتى ماماندارمەن قامتاماسىز ەتۋ اسا وزەكتى مىندەت دەپ سانايدى. بۇل رەتتە ول ەڭ الدىمەن، سۋ، ەنەرگەتيكا، قۇرىلىس جانە باسقا دا سالالاردا قاتتى بايقالىپ وتىرعان كادر تاپشىلىعىن جويۋ قاجەتتىگىن اتاپ ءوتتى. سونداي-اق بولاشاقتا سۇرانىسقا يە بولاتىن كاسىپتەر ءۇشىن بىلىكتى ماماندار دايارلاۋ كەرەك. بۇل باعىتتا ناقتى جۇمىستار باستالعانى دا ءمالىم.
«ۇكىمەت جوعارى ءبىلىم سالاسىن حالىقارالىق ءبىلىم بەرۋ كەڭىستىگىمەن ىقپالداستىرىپ جاتىر. ءقازىردىڭ وزىندە ەلىمىزدە شەتەلدىڭ بەلگىلى 23 جوعارى وقۋ ورنى جۇمىس جۇرگىزە باستادى. ولارعا مەيلىنشە قولداۋ كورسەتۋ كەرەك. اتاپ ايتقاندا، مامان دايارلاۋعا بەرىلەتىن مەملەكەتتىك تاپسىرىستى بىرتىندەپ كوبەيتكەن ءجون. بۇل ءتاسىلدى ءبىلىم باعدارلاماسى زامان تالابىنا ساي كەلەتىن ءوز وقۋ ورىندارىمىزعا دا قولدانۋعا بولادى. وسى رەتتە گرانت قۇنى جاستاردى ساپالى وقىتۋعا مۇمكىندىك بەرۋگە ءتيىس. مەملەكەت قارجىسىن ۋنيۆەرسيتەتتىڭ بارىنە شاشىراتىپ، وڭدى-سولدى تاراتا بەرۋگە بولمايدى»، - دەدى پرەزيدەنت.
مەملەكەت باسشىسى سونداي-اق ۇزدىك ۋنيۆەرسيتەتتەردىڭ ناقتى سەكتورمەن بايلانىسىن نىعايتۋ، يننوۆاسيالىق ساياساتتى ەلىمىزدىڭ عىلىمي-تەحنولوگيالىق باسىمدىقتارىمەن ۇيلەستىرۋ ماسەلەسىنە توقتالدى. سەبەبى بۇل ءار سالاداعى يننوۆاسياعا سەرپىن بەرەدى. سونداي-اق جوعارى وقۋ ورىندارىنداعى قولدانبالى عىلىمنىڭ الەۋەتىن ارتتىرادى. سونىمەن قاتار عالىمداردىڭ شەتەلدەگى تاعىلىمداماسىن انشەيىن سينەكۋراعا جانە «اكادەميالىق تۋريزمگە» اينالدىرماۋ كەرەكتىگى دە تىلگە تيەك بولدى. پرەزيدەنت سونداي-اق جوعارى وقۋ ورىندارى عانا ەمەس، تەحنيكالىق جانە كاسىپتىك ءبىلىم بەرۋ مەكەمەلەرى دە بىلىكتى كادرلار دايارلاۋى قاجەتتىگىن ەسكەرتە كەلە، ۇكىمەت كوللەدجدە جاقسى وقىعان تۇلەكتەردى ماماندىعى بويىنشا مەملەكەتتىك قىزمەتكە الۋ مۇمكىندىگىن قاراستىرۋعا ءتيىس ەكەندىگىن ايتتى.