بۇگىن، 22 تامىزدا، قازاقستاندىق پاراليمپياداشىلاردىڭ ءبىر توبى پاريجگە ۇشىپ كەتتى. 28 تامىز بەن 8 قىركۇيەك ارالىعىندا فرانسيا استاناسىندا XVII جازعى پاراليمپيادا ويىندارى وتەدى.
قازاقستاننىڭ دەلەگاسيا قۇرامىنا وتىرىپ وينايتىن ۆولەيبول، پاراۇستەل تەننيسى جانە ءپاراجۇزۋ سپورت تۇرلەرىنەن ۇلتتىق قۇرامالاردىڭ سپورتشىلارى ەندى، دەپ حابارلايدى مادەنيەت جانە سپورت مينيسترلىگى.
مينيسترلىك اتاپ وتكەندەي، قازاقستان وتىرىپ وينايتىن ۆولەيبولدان 28 جىل ىشىندە العاش رەت قاتىسادى، ال پاراۇستەل تەننيسىندە العاش رەت ونەر كورسەتەدى.
جالپى، پاريجدەگى پاراليمپيادادا قازاقستاننىڭ 9 سپورت تۇرىنەن 33 ليسەنزياسى بار. بۇل ويىندارعا قازاقستاننان 44 سپورتشى قاتىسادى، بۇل ەلدىڭ جازعى پاراليمپيادا ويىندارىنا قاتىسۋ تاريحىنداعى ەڭ ۇلكەن دەلەگاسيا بولماق.