الماتى كوشەلەرى كەيىنگى جىلدارى ەلەكترساموكاتتارمەن تولدى. كەپتەلىسسىز قوزعالىسقا ىڭعايلى، ارزان ءارى جىلدام. ءبىر قاراعاندا الماتى ءۇشىن تاپتىرماس كولىك كورىنگەنىمەن، ستاتيستيكانىڭ سوزىنشە بۇگىندە ءقاۋىپ پەن زارداپتىڭ نەگىزگى سەبەپكەرىنە اينالىپ وتىر. اqshamnews.kz ءتىلشىسى زاماناۋي قاتىناۋ قۇرالىنىڭ كەلەشەگىن بولجاپ كوردى.
"ءبىر كۇندە كەمى 2-3 ادام ساموكاتتان زارداپ شەگەدى"
بالالار جەدەل جاردەم ورتالىعىنىڭ قابىلداۋ ءبولىمىن باسقاراتىن مەيىرجان قۇرمانالييەۆ ەلەكترساموكاتتارعا قاتىستى تاڭعالارلىق دەرەك ۇسىندى. ونىڭ ايتۋىنشا، اۋرۋحاناعا كۇن سايىن 2-3 بالا ساموكاتتان العان جاراقاتپەن تۇسەتىنىن ايتادى.
"جازدا ايىنا 60-90 بالا، ياعني ءبىر ماۋسىمدا 300-گە جۋىق بالا جاراقات الادى. 30 پايىزى اۋرۋحاناعا جاتقىزىلادى. كوبىنە بىرنەشە جاراقاتپەن ءبىر-اق تۇسەدى: باس-مي شايقالۋى، قول-اياق سىنۋى، سىرىپ الۋ مەن كۇيىك شالۋ. مۇنداي جاراقاتتار بۇرىن بالالاردا ءجيى بولمايتىن" دەدى ول.
دارىگەردىڭ ايتۋىنشا، ساموكات سوققىسىنىڭ كۇشى كولىكتىكىمەن شامالاس:
"ساموكاتتىڭ ءوزى 20-30 كەلى، ۇستىندەگى اداممەن بىرگە 70-100 كەلى بولادى. سول سالماق 30-40 كم/ساع جىلدامدىقپەن 30 كەلىلىك بالانى قاعىپ وتسە، ول 4 مەترگە ۇشادى. بۇل - كولىك سوققانمەن بىردەي" دەدى دارىگەر.
جول ەرەجەسى نەگە تەك قاعاز جۇزىندە قالدى؟
كيكشەرينگ كومپانيالارى (Jet، ياندەكس، Woosh، Bolt) بىرنەشە رەت قاۋىپسىزدىك شارالارىن ەنگىزۋگە ۋادە بەردى. ءبىرشاما ەرەجەلەر ەسكەرتىلگەنىمەن، قۇلاق اساتىندار از. ناقتى ايتار بولساق:
- 18 جاسقا تولماعان جاسوسپىرىمدەرگە مىنۋگە؛
- ەكى ادام بولىپ ءمىنىپ جۇرۋگە؛
- تروتۋاردا جىلدامدىقتى اسىرۋعا بولمايدى.
كومپانيا ەرەجە بۇزۋشىلاردى بۇعاتتاۋ تۋرالى ايتقان ەدى. الايدا ءقازىر-اق كوشەگە شىقساڭىز، قوس-قوستان ءمىنىپ كەزىپ جۇرگەندى، تروتۋارلاردا قاتتى جىلدامدىقپەن بەزىپ جۇرگەندى دە بايقاۋعا بولادى.
ال پوليسيا دەرەگىنشە، جىل باسىنان بەرى قازاقستاندا ەلەكترساموكاتتىڭ قاتىسۋىمەن 360-تان استام جول اپاتى تىركەلىپ، 224 ادام جارالانعان. سونىڭ 95%-ى الماتىدا بولعان. ساموكات جۇرگىزۋشىلەرى 20 مىڭنان استام ەرەجە بۇزعان، ونىڭ 7،4 مىڭى الماتىدا.
دەپۋتات: "ساموكاتتاردى جالعا بەرۋدى توقتاتۋ كەرەك"
الماتى ءماسليحاتىنىڭ دەپۋتاتى بەيبىت قۇسايىنوۆ بۇل ماسەلەنى تۇبەگەيلى شەشۋدى ۇسىنادى:
"ءتارتىپ ورنامايىنشا، ساموكاتتاردى جالعا بەرۋدى توقتاتۋ كەرەك. بىرىنشىدەن — تروتۋاردا ءجۇرۋدى ءبىرجولا توقتاتۋ، تەك ۆەلوجولمەن ءجۇرۋ. ءبىراق بىزدە ۆەلوجول جەتىسپەيدى، سوندىقتان الدىمەن سونى شەشۋ كەرەك" دەدى ول.
"ساموكاتتارعا تيىسپەيىك!"
ال ۋربانيست ۆلاديسلاۆ فيلاتوۆ ساموكاتتارعا تىيىم سالۋ ەمەس، ولار ءۇشىن ينفراقۇرىلىم قۇرۋ قاجەت ەكەنىن ايتادى:
"ءبىر اۆتوتۇراقتىڭ ورنىنا 9–11 ساموكات سىيادى. بۇل - ادامداردى كولىككە وتىرماۋعا ىنتالاندىراتىن قۇرال. ولاردى جويۋ ەمەس، كەڭ ۆەلوجولدار، جابدىقتالعان وتكەلدەر مەن تۇراقتار سالۋ كەرەك" دەيدى.
ول جۋىردا تورايعىروۆ كوشەسىن اباتتاندىرۋ جوباسىنا قاتىسىپ، ارنايى ساموكات تۇراقتارى مەن رەزەرۆتىك الاڭدار سالۋعا اتسالىسقان.
"اپاتتار بولىپ جاتىر دەپ ولاردى تۇبەگەيلى جويۋعا بولمايدى. الدىمەن پايداسىن دا ەسكەرۋ كەرەك. ەگەر ينفراقۇرىلىم تۇزەلسە، ماسەلە بۇلاي ۋشىقپاس ەدى"، - دەيدى ۋربانيست.