«جۇرەرگە جول جوق». الماتى ىرگەسىندەگى اباي اۋىلىنداعى ورتاق كوشە جەر تەلىمى رەتىندە جەكەمەنشىككە ساتىلىپ كەتكەن. سونىڭ كەسىرىنەن تۇرعىندار ءوزى جاماپ-جاسقاپ وتىرعان جولىنان ايىرىلىپ قالعان. جەر يەسىنىڭ دە قۇجاتى تۇگەل. سوندىقتان جان-جاعىن قورشاپ، قۇرىلىستى باستاپ كەتكەن. ال ۇيىنە كىرىپ-شىعۋى مۇڭعا اينالعان جۇرت ەندى كىمگە شاعىم ايتارىن بىلمەي وتىر، دەپ حابارلايدى aqshamnews.kz كتك تەلەارناسىنا سىلتەمە جاساپ.
اباي اۋىلىنىڭ تۇرعىندارى جەردىڭ ساتىلعانى تۋرالى جاڭالىقتى وسىدان ءبىر اي بۇرىن ەستىگەن. يەسى اۋماعىنا بىردەن تاس توگىپ، جان-جاعىن قورشاۋعا الىپتى. بەس كوشەمەن قيىلىسىپ جاتقان ورتالىق كوشەنى ەندى حالىق اينالىپ وتۋگە ءماجبۇر.
ال اينالىپ وتەتىن ەكىنشى جولدىڭ سيقى دا جامان. ءدال ورتاسىندا كەسىلگەن اعاش دىڭكەلەرى مەن ءدوڭ بار، ال ماڭايى ءشوپ-شالاڭ. جۇرت: «اتقامىنەرلەر، ەڭ بولماعاندا، وسى جولدى تەگىستەپ بەرسە» دەيدى.
- وسى جەر جول بولىپ تۇردى. بەس كوشەنىڭ توعىسى بولدى. جان-جاقتان كەلەتىن كوشەلەردىڭ ءبارى وسى كوشەدەن توعىسادى. مەكتەپكە باراتىن جول دا وسى بولاتىن. 13 جىل بويى بوس جاتقان جەر ءبىر كۇندە، ءبىر ايدىڭ ىشىندە بەلگىسىز ءبىر سەبەپتەرمەن قورشالدى. حالىق سول مولداعۇلوۆا كوشەسىن اشۋ ءۇشىن اقشا جيناۋ كەرەك پە؟ نە سەبەپتى حالىق بۇل كوشەدە جابايى وسكەن اعاشتىڭ دىڭكەسىن الۋ كەرەك؟! - دەپ شاعىمداندى اۋىل تۇرعىنى ءماريام اياپوۆا.
جول جوق، نە الدىندا دا، نە ارتىندا جول جوق. ءبارىن بەكىتىپ تاستاعان. ءبىز ءقازىر يىرلەپ-يىرلەپ، ايتەۋىر ءبىر جەردەن تەسىك تاۋىپ بارامىز، باراتىن جەرىمىزگە. سوندا مىنا جەر قالاي عانا ساتىلىپ تۇر؟! الەۋمەتتىك،، حالىقتىڭ ءجۇرىپ-تۇراتىن جەرىن ءبىر جەكە ادام وزىنە الا سالا ما؟!، - دەپ اشىندى راحمەتوللا قازدان ۇلى.
«تار جولعا تاڭىلدىق» دەگەن تۇرعىندار اۋىلدا، اسىرەسە، كولىكپەن قاتىناۋ قيىندادى دەيدى. جەدەل جاردەم شاقىرسا، كولىك ءۇيدىڭ ماڭايىنا دا كەلە المايدى ەكەن.
-بالالارىمىز ساباققا بارادى. مىنە، قىركۇيەك تە كەلىپ قالدى. مىنا جەردە ءدوڭ جاتىر، بالالار وتە المايدى. بالا-شاعامىزعا سول جولدى دۇرىستاپ بەرسەڭىزدەر دەگەن ءوتىنىشىمىز بار. سوسىن مىناۋ شاشىپ تاستاعان نارسەدەن جۇرە الماي جاتىرمىز جەدەل جاردەم كولىگىنىڭ كەلۋى دە قيىندادى، -دەيدى اۋىل تۇرعىنى ايمان تاتييەۆا.
ال كوپكە ورتاق جولدى ساتىپ العان ادام جۇرتتان بوسقا دۇرلىكپەۋدى سۇرادى. «ون سوتىق جەر ۋچاسكەسىن زاڭدى تۇردە ساتىپ الدىم» دەگەن ول، بارلىعىن سوتتا دالەلدەۋگە دايىن.
مەنىڭ شەكارام مىنە، مىنە. مىنا باعانا تۇر عوي سودان بىلاي قاراي مەنىڭ شەكارام. انا ءۇي دە زاڭسىز، مىنا ءۇي دە زاڭسىز. بارلىعى جولعا كىرىپ العان. سوتقا بەرسە، بەرە بەرسىن. بۇل جەر، نەگىزى، 2011 جىلى الىنعان، 2019 جىلى مەن ساتىپ الدىم. بۇل جەردەگى تۇسىنبەگەن ادامدار مەنى اكىممەن بايلانىسى بار دەيدى، ال مەن اكىمنىڭ كىم ەكەنىن بىلمەيمىن دە، - دەدى جەر يەسى ءاسيا جولداسوۆا.
اتقامىنەرلەر حالىقتىڭ ماسەلەسىنەن حاباردار. تەك قايسىسىنىڭ جەرى زاڭدى، قايسىسى زاڭسىز، ول جاعىن بىلمەيدى. دەسە دە الداعى ەكى اپتادا ارنايى مامان شاقىرىپ، جاعدايدى رەتكە كەلتىرۋگە ۋادە بەردى.
امانتاي تەرلىكبايەۆ، رايىمبەك اۋىل وكرۋگى اكىمىنىڭ ورىنباسارى:
-تۇستەن كەيىن مىنا بوس جەرگە تەحنيكا كىرگىزىپ، جولدى اشىپ، قولدانىسقا بەرەمىز. ۋاقىتشا، ءقازىر بەرە تۇرامىز. الدىمەن جولىن اشىپ بەرەيىك، سودان انىق-قانىعىن انىقتاپ، سوسىن جوسپارلايمىز. كوميسيا شىعىپ، مىنا كىرىپ كەتكەن ۇيلەردى گەودەزيست شاقىرىپ، قازىقتارىن قاقتىرىپ، حابارلاما تاراتىپ بەرەمىز.
ءبىراق بۇعان حالىقتىڭ سەنىمى از. ويتكەنى اكىم «ازىرگە ءجۇرىپ-تۇرۋعا جارايتىن جولدى رەتتەپ بەرەمىز» دەپ، بۇعان دەيىن دە ۋادە بەرىپتى. سوندىقتان جۇرت ولاردان قايىر بولماسا، سوتقا جۇگىنەمىز دەپ وتىر.