قازاقستان مەن وزبەكستان ون جىلعا ارنالعان ستراتەگيالىق دامىتۋ باعدارلاماسىن بەكىتتى

كەڭەس وتىرىسىندا ەكى ەلدىڭ ساۋدا-ەكونوميكا، كولىك-ترانزيت، سۋ شارۋاشىلىعى جانە ەنەرگەتيكا، مادەني-گۋمانيتارلىق سالالارداعى ىنتىماقتاستىعىن كەڭەيتۋدىڭ باسىم باعىتتارى تالقىلاندى.

مەملەكەت باسشىسى قاسىم-جومارت توقايەۆ قازاق-وزبەك قاتىناسى ستراتەگيالىق سەرىكتەستىك جانە وداقتاستىق رۋحىندا تۇراقتى دامىپ كەلە جاتقانىن اتاپ ءوتىپ، ەلىمىز وزبەكستانمەن ىنتىماقتاستىقتى نىعايتا تۇسۋگە ايرىقشا كوڭىل بولەتىنىن جەتكىزدى.

– بىلتىر وداقتاستىق قاتىناستار تۋرالى تاريحي شارتقا قول قويدىق. بۇگىن الداعى ون جىلعا ارنالعان ستراتەگيالىق ارىپتەستىكتى جانە وداقتاستىقتى دامىتۋ باعدارلاماسىن بەكىتەمىز. وسى ماڭىزدى قادامدار ەكى ەلدىڭ بايلانىسىن ىلگەرىلەتۋگە ايرىقشا سەرپىن بەرەتىنىنە سەنىمدىمىن، – دەدى پرەزيدەنت.

قاسىم-جومارت توقايەۆتىڭ پىكىرىنشە، قىسقا ۋاقىت ىشىندە ءوزارا تاۋار اينالىمىن بەس ميلليارد دوللارعا دەيىن جەتكىزىپ، تاياۋ جىلدارى بۇل كورسەتكىشتى ەكى ەسەلەۋگە ەلدەرىمىزدىڭ الەۋەتى جەتەدى.

– اۋىل شارۋاشىلىعى، ماشينا جاساۋ، ەنەرگەتيكا، كوممۋنيكاسيا، سيفرلاندىرۋ سەكىلدى پەرسپەكتيۆتى سالالارداعى ىنتىماقتاستىق الەۋەتىن تولىق پايدالانۋ ماڭىزدى. بۇل رەتتە قازاق-وزبەك شەكاراسىنداعى «ورتالىق ازيا» حالىقارالىق ونەركاسىپ كووپەراسياسى ورتالىعىن تەزىرەك ىسكە قوسۋ قاجەت. مەملەكەتارالىق كەڭەس پەن ءوڭىرارالىق ىنتىماقتاستىق فورۋمىنىڭ قىزمەتىنەن دە ەلەۋلى ناتيجە كۇتەمىز. وڭىرلىك كووپەراسياعا زور ءۇمىت ارتامىز. قازىرگى كەزدە جالپى سوماسى 3 ميلليارد دوللاردان اساتىن 70-كە جۋىق بىرلەسكەن جوبامىز بار. ونىڭ اياسىندا 14 مىڭ جۇمىس ورنى اشىلادى. ءبىز بۇل باعىتتاعى بايلانىستاردى ودان ءارى نىعايتىپ، بيزنەس ءۇشىن قولايلى جاعداي جاساۋعا ءازىرمىز، – دەدى پرەزيدەنت.

سونىمەن قاتار قاسىم-جومارت توقايەۆ كولىك-ترانزيت ارتىقشىلىقتارىن بارىنشا ءتيىمدى پايدالانۋ ماڭىزدى ەكەنىن ايتتى. بۇل رەتتە مەملەكەت باسشىسى تاريفتەردى وڭتايلاندىرۋ، اكىمشىلىك راسىمدەردى جەڭىلدەتۋ جانە جۇك جەتكىزۋ مەرزىمىن قىسقارتۋ جونىندە بىرلەسكەن شارالار قابىلداۋ قاجەت ەكەنىنە نازار اۋداردى.

بۇدان بولەك، مەملەكەتارالىق كەڭەس وتىرىسى بارىسىندا ترانسشەكارالىق وزەندەردىڭ سۋ رەسۋرستارىن كەشەندى ءارى راسيونالدى پايدالانۋ، مادەني-گۋمانيتارلىق ىنتىماقتاستىقتى نىعايتۋ ماسەلەلەرى قوزعالدى.

ءوز كەزەگىندە وزبەكستان پرەزيدەنتى قازاقستانعا جاساعان بۇل جولعى مەملەكەتتىك ساپارىنىڭ ناتيجەسىندە ستراتەگيالىق سەرىكتەستىك پەن وداقتاستىق مۇلدەم جاڭا دەڭگەيگە كوتەرىلەتىنىنە سەنىم ءبىلدىردى.

– بۇگىن ءبىز جوعارى مەملەكەتارالىق كەڭەستىڭ ءبىرىنشى وتىرىسىن اشىپ وتىرمىز. بۇل، شىن مانىندە، ەكىجاقتى قاتىناستار تاريحىنداعى ايتۋلى وقيعا. بۇگىنگى كەلىسسوزدەر ءبىزدىڭ ناقتى باعىتتار بويىنشا ىنتىماقتاستىعىمىزدى ودان ءارى كەڭەيتۋگە، سونداي-اق دوستاس ءارى باۋىرلاس حالىقتارىمىزدىڭ وسىپ-وركەندەۋىنە ىقپال ەتەتىنىنە سەنىمدىمىن، – دەدى شاۆكات ميرزيويەۆ.

وزبەك ەلى باسشىسىنىڭ ايتۋىنشا، ساپار الدىندا مەملەكەتارالىق كوميسسيانىڭ وتىرىسى، بيزنەس فورۋم جانە ءبىرقاتار مادەني ءىس-شارالار ءوتتى. 2034 جىلعا دەيىنگى ستراتەگيالىق ارىپتەستىك پەن وداقتاستىق باعدارلاماسى ازىرلەندى. سىرتقى ساياسات ۆەدومستۆولارى باسشىلارىنىڭ جەتەكشىلىگىمەن كەڭەس قۇرىلىپ جاتىر. مۇنىڭ ءبارى ەكىجاقتى ىقپالداستىقتىڭ نىعايۋىنا وڭ سەپتىگىن تيگىزەدى.

كەڭەس بارىسىندا تاراپتار ەكى ەلدىڭ پارلامەنتتەرى، ۇكىمەتتەرى، سىرتقى ساياسات ۆەدومستۆوسى جانە سالالىق مينيسترلىكتەرى اراسىنداعى بايلانىستاردى ارتتىرا ءتۇسۋ ماڭىزدى ەكەنىنە نازار اۋداردى. سونداي-اق حالىقارالىق جانە وڭىرلىك قۇرىلىمدار، سونىڭ ىشىندە بۇۇ، دۇنيەجۇزىلىك ساۋدا ۇيىمى، ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋلەرى جانە «ورتالىق ازيا پليۋس» فورماتى اياسىندا بىر-بىرىنە قولداۋ بىلدىرۋگە ۋاعدالاستى.

جيىندا قازاقستان رەسپۋبليكاسى پرەمەر-مينيسترىنىڭ ورىنباسارى سەرىك جۇمانعارين، وزبەكستان رەسپۋبليكاسى پرەمەر-مينيسترىنىڭ ورىنباسارى جامشيد حودجايەۆ، قازاقستان رەسپۋبليكاسىنىڭ كولىك ءمينيسترى مارات قارابايەۆ، وزبەكستان رەسپۋبليكاسىنىڭ كولىك ءمينيسترى يلحوم ماكحاموۆ، قازاقستان رەسپۋبليكاسىنىڭ ەنەرگەتيكا ءمينيسترى الماسادام ساتقالييەۆ، وزبەكستان رەسپۋبليكاسىنىڭ ەنەرگەتيكا ءمينيسترى جۋرابەك ميرزاماحمۋدوۆ، قازاقستان رەسپۋبليكاسىنىڭ سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ، وزبەكستان رەسپۋبليكاسىنىڭ سۋ شارۋاشىلىعى ءمينيسترى شاۆكات حامرايەۆ، قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا، وزبەكستان رەسپۋبليكاسىنىڭ مادەنيەت ءمينيسترى وزودبەك نازاربەكوۆ، قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك، وزبەكستان رەسپۋبليكاسىنىڭ جوعارى ءبىلىم، عىلىم جانە يننوۆاسيا ءمينيسترى كونگراتباي شاريپوۆ بايانداما جاسادى.

كەڭەس وتىرىسىنىڭ قورىتىندىسى بويىنشا ءبىرقاتار شەشىمگە قول قويىلدى.