ەلىمىزدەگى ۇلتتىق ۇلان اسكەري بولىمدەرى مەن اسكەري قىزمەتشىلەرى بىرنەشە مەملەكەتتىك ماڭىزى بار مىندەتتەردى اتقارادى. سولاردىڭ قاتارىندا الماتى قالاسىنداعى 3650 اسكەري ءبولىم دە بار. بۇل ءبولىم دە ەلىمىز ءۇشىن اسا ماڭىزدى مەملەكەتتىك جانە ستراتەگيالىق نىسانداردى كۇزەتەدى.
وسى اسكەري بولىمدە قىزمەت اتقارىپ جۇرگەن، اسكەري ماماندىقتى بالا كەزىنەن ارمانداپ، اتا جولىن ۇستانىپ، وتانىن قورعاۋدى ماقسات تۇتقان قاراۋىل باستىعىنىڭ كومەكشىسى كىشى سەرجانت ەرلان باشتىبايەۆپەن كەزدەسىپ، اڭگىمەلەسكەن بولاتىنبىز.
ەرلان بەرىكباي ۇلى ىرگەمىزدەگى جەتىسۋ وبلىسىنا قاراستى ن.ەسەبولات اۋىلىندا دۇنيەگە كەلگەن. ونىڭ سپورتقا قىزىعۋشىلىعى دا جۇرەگىنە سوناۋ بالا كۇنىندە قوناقتاعان. 2005 جىلى تالدىقورعانداعى ەكونوميكالىق-تەحنيكالىق كوللەدجىنە وقۋعا تۇسەدى. ول جاستايىنان ىشكى ىستەر ورگانىندا قىزمەت اتقارعان اتاسىنىڭ قاسىندا ءجۇرىپ كەۋدەسىنە وتانعا، ەلگە، جەرگە دەگەن ماحابباتتى ورنىقتىرا ءبىلدى. وقۋدى جاقسى اياقتاپ، سول ايماقتا ورنالاسقان ءۇشارال قالاسىنداعى 40398 اسكەري بولىمگە اسكەري بورىشىن وتەۋگە كەلەدى. جاۋىنگەرلىك قىزمەتپەن قاتار سپورتتى دا بىرگە الىپ جۇرگەن ەرلان سامبودان وتكەن جارىستاردا كوپتەگەن جەتىستىككە جەتىپ كوزگە تۇسەدى.
اسكەري بورىشىن ابىرويمەن وتەپ كەلگەن سوڭ، ماماندىعى بويىنشا كوپتەگەن جەردە قىزمەت اتقارادى. ءبىراق بالا كەزدەگى ارمانى جۇرەگىنە تىنىشتىق بەرە قويمايدى. ءسويتىپ اتا تاربيەسىن كورىپ وسكەن ۇل 2011 جىلى 3650 اسكەري بولىمىنە كەلىسىمشارت قىزمەتكەرى بولىپ سارباز اتقىش لاۋازىمىنا تاعايىندالادى. قازىرگى كۇنى اسكەري بولىمدە بولىپ جاتقان جاۋىنگەرلىك، سپورتتىق سامبو كۇرەسىنەن بولاتىن جارىستارعا قاتىسىپ، جوعارعى كورسەتكىشتەر كورسەتىپ كەلەدى. «وڭتۇستىك» وڭىرلىك قولباسشىلىعى جانە اسكەري ءبولىم باسشىلىعى تاراپىنان كوپتەگەن گراموتا، العىس حاتتارمەن ماراپاتتالعان. جاۋىنگەرلىك قىزمەتتەگى قىراعىلىعى ءۇشىن «قوعامدىق ءتارتىپتى ساقتاعانى ءۇشىن» ءتوس بەلگىسىمەن دە ناگرادتالعان.
ال بىلتىر اعا مامان-قاراۋىل باستىعىنىڭ كومەكشىسى لاۋازىمىنا تاعايىندالدى. اسىل جار ءۇش قىزدىڭ اكەسى.
– قاراۋىلدىق قىزمەت – كەز-كەلگەن ادامنىڭ قولىنان كەلە بەرمەس شارۋا. سەبەبى 12 ساعات بويى كىرپىك قاقپاي، تىكەسىنەن تىك تۇرىپ، ءوزىنىڭ جاۋاپكەرشىلىگىنە بەرىلگەن اۋماعى مەن بەكەتىن قورعاۋ جانە قاداعالاۋ – ۇلكەن مىندەت. سوندىقتان كۇن سايىن قولىنا قارۋ ۇستاپ، جاۋىنگەرلىك تاپسىرمانى ورىنداۋ ءۇشىن تەك شىدامدى، مورالدىق-پسيحولوگيالىق احۋالى مىعىم، قىراعى، باتىل، سەرگەك تە زەرەك دەپ تانىلعان ۇزدىك كەلىسىمشارت قىزمەتكەرلەرى تاعايىندالادى. مەملەكەتتىك ماڭىزدى نىساندى قورعايتىن جانە كۇزەتەتىن كەلىسىمشارت قىزمەتكەرى ءتۇرلى پسيحولوگيالىق تەست تاپسىرىپ، فيزيكالىق شارتتارعا سايكەس كەلۋى كەرەك. سوندىقتان ولار جاۋىنگەرلىك قىزمەتكە كەلگەننەن باستاپ وزدەرىنىڭ ارنايى مىندەتتەرىن جانە قارۋدى قالاي قولدانۋ كەرەكتىگىن، جاۋىنگەرلىك دايىندىقتارىن ارتتىرىپ وتىرادى. قارۋدى قالاي قولدانۋ كەرەكتىگىن جاتقا ءبىلۋ جانە ونى شىنايى جاعدايدا قولدانۋ اركىمنىڭ قولىنان كەلە بەرمەيتىن ءىس دەسەك تە بولادى. ءوز قارۋىن اۆتوماتتى تۇردە قولدانا ءبىلۋ ءۇشىن ايىنا ەكى رەت كۇندىز جانە تۇنگى ۋاقىتتا اتىس جاتتىعۋلارى وتكىزىلەدى. اتىس بارىسىندا وفيسەرلەر، كەلىسىمشارت قىزمەتكەرلەرى، ساربازدار وزدەرىنىڭ كومانديرلەرىمەن بىرگە قاۋىپسىزدىك شارالارىن ساقتاي وتىرىپ، قاراۋىلدىق قىزمەتكە تىكەلەي قاتىسى بار ءارتۇرلى جاتتىعۋلاردى ورىندايدى. ءبىزدىڭ 3650 اسكەري ءبولىمىنىڭ ساربازدارى، سەرجانتتارى جانە وفيسەرلەرى مەگاپوليستىڭ تىنىشتىعى ءھام قاۋىپسىزدىگى ءۇشىن قاي كەزدە دە ساپتا تۇرادى، – دەيدى كىشى سەرجانت ەرلان باشتىبايەۆ.