الماتى وبلىسىندا ءۇش ساعاتتا 40 مىڭعا جۋىق ادام اكىمگە لايىق تۇلعالارعا داۋىس بەرىپ ۇلگەردى. سايلاۋ كوميسسيالارىنىڭ ۇسىنعان دەرەكتەرىنە سايكەس، سايلاۋشىلاردىڭ جالپى سانىنىڭ 17 پايىزى، ياعني 38 مىڭ 783 ادام داۋىس بەرگەن.
قالامىزدىڭ ماڭىندا ورنالاسقان قاراساي اۋدانىنا قاراستى ەلتاي اۋىلدىق وكرۋگىنىڭ اكىمى قىزمەتىنە العاشىندا بەس ۇمىتكەر تۇسكەن. ولاردىڭ بىرەۋى Nur Otan پارتياسىنان، بىرەۋى قازاقستان حالىق پارتياسىنان بولسا، ۇشەۋى ءوزىن-وزى ۇسىنعاندار قاتارىنان. الايدا قحپ-نىڭ وكىلى مەن ءوزىن ۇسىنعان ءبىر ۇمىتكەر تالاپتارعا ساي بولماعاندىقتان، دودادان شىعىپ قالىپ، ءۇش ادام حالىق تاڭداۋىنا ءتۇستى.
وسىلايشا، Nur Otan پارتياسىنىڭ وكىلى ءبىرجان ماحاتوۆ، رايىمبەك اۋىلدىق وكرۋگى اكىمدىگىنىڭ قىزمەتكەرى ەلامان ومىربايەۆ پەن اۋداندىق ءتۇرعىن-ۇي كوممۋنالدىق شارۋاشىلىعىنىڭ باسشىسى ەسكەندىر ەگەۋبەك اۋىلدىق وكرۋگتىڭ اكىمى ورىنتاعىنان ۇمىتكەرلەر بولىپ تىركەلدى.
ەلتاي اۋىلدىق وكرۋگىندە قۇرىلعان 6 سايلاۋ ۋچاسكەسى تاڭعى ساعات 6-دا ءوز جۇمىسىن باستاپ، 7-دە العاشقى سايلاۋشىلاردى قابىلداي باستادى. العاشقى ءبىر ساعاتتىڭ ىشىندە 610 ادام، ياعني، سايلاۋشىلاردىڭ 5،61 پايىزى ءوز تاڭداۋلارىن جاساپ ۇلگەردى. جالپى، اتالعان وكرۋگتە 1872 سايلاۋشى بار.
«قازاقستان حالقىنىڭ 40 پايىزىنىڭ اۋىلداردا تۇراتىنىن ەسكەرسەك، بۇل وتە دۇرىس قادام. بۇل، شىن مانىندە، اۋىل تۇرعىندارىنىڭ مۇددەسى ءۇشىن جاسالىپ وتىر. ءبىز مەملەكەت باسشىسىنىڭ اۋىل اكىمدەرىن سايلاۋ تۋرالى باستاماسىن شىن جۇرەگىمىزبەن قولداپ وتىرمىز. بۇل وقيعا ەلىمىزدىڭ تاريحىنداعى ايتۋلى بەلەس»، – دەدى اۋىل تۇرعىنى تەمىرعالييەۆ جانبولات.