اۋىلدىق وكرۋگ اكىمدەرىن سايلاۋ كەزىندە الماتى وبلىسىنىڭ تۇرعىندارى بەلسەندىلىك تانىتۋدا. بۇل تۋرالى «Jetisy media» اقپاراتتىق الاڭىندا وتكەن بيريفينگتە ايتىلدى. جيىنعا وبلىستىق اۋماقتىق سايلاۋ كوميسسياسىنىڭ مۇشەسى قاھارمان جاقسىلىق، وبلىس بويىنشا سانيتارلىق-ەپيدەميولوگيالىق باقىلاۋ دەپارتامەنتىنىڭ باسپا ءسوز حاتشىسى ءاليا شاعياحمەت جانە وبلىستىق پوليسيا دەپارتامەنتى جەرگىلىكتى پوليسيا قىزمەتى باسقارماسى باستىعىنىڭ ورىنباسارى قايسار مۋحمەتوۆ قاتىستى.
– تىركەلگەن 235 ۇمىتكەرگە اۋىل سايلاۋشىلارى داۋىس بەرۋدە. ورتاشا باسەكەلەستىك ءبىر ورىنعا 3،3 پايىز بولىپ وتىر. وبلىس تۇرعىندارى داۋىس بەرۋ بەلسەندىلىگى بويىنشا جوعارى كورسەتكىشكە قول جەتكىزۋدە. قازىرگى تاڭدا سايلاۋ كوميسسيالارىنىڭ ۇسىنعان دەرەكتەرىنە سايكەس، 38 783 ادام داۋىس بەردى، – دەدى. ال ءاليا عالىمجان قىزى بولسا، ەپيدەميولوگيالىق جاعدايدى بايانداپ، بۇگىنگى كۇننەن باستاپ الماتى وبلىسى "سارى" ايماققا ەنگەنىن حابارلادى.
– سانيتارلىق تالاپتار ءاربىر سايلاۋ ۋچاسكەلەرىندە ساقتالعان. تەرمومەتردىڭ كومەگىمەن كەلۋشىلەردىڭ دەنە قىزۋىن ولشەۋ ءۇشىن ارنايى جاۋاپتى قىزمەتكەرلەر بەكىتىلگەن. 1-1،5 مەتر اراقاشىقتىقتى ساقتاۋ ارقىلى سايلاۋشىلاردىڭ قوزعالىسىن باعىتتايتىن جول كورسەتكىشتەرى بار. عيماراتتا قولدى دەزينفەكسيالاۋعا ارنالعان قۇرال مىندەتتى تۇردە تۇرۋى، بەتپەردە رەجيمىن ساقتاۋ جانە ونى 3 ساعات سايىن اۋىستىرۋ كەرەك. عيماراتقا كىرگەندە قولدى دەزينفەكسيالاۋ، قول الىسۋدى جانە تىكەلەي بايلانىستىڭ باسقا دا تۇرلەرىن بولدىرماۋ قاجەت، – دەگەن ول سانيتارلىق تالاپتار بۇزىلعان جاعدايدا ق ر اكىمشىلىك قۇقىق بۇزۋشىلىق تۋرالى كودەكسىنىڭ 425-بابى بويىنشا جاۋاپقا تارتىلىپ، 83 مىڭ تەڭگە كولەمىندە ايىپپۇل سالىناتىنىن ەسكەرتتى.
باسپا ءسوز ءماسليحاتى بارىسىندا قايسار جاقسىلىقبەك ۇلى ءتارتىپ ساقشىلارى ازاماتتاردىڭ بوستاندىعىن جانە قۇقىقتارىن قورعاۋ، قوعامدىق ءتارتىپتى جانە قاۋىپسىزدىكتى قامتاماسىز ەتۋ بويىنشا جۇمىس جۇرگىزىپ جاتقانىن ايتتى. پوليسەيلەر سايلاۋ بيۋللەتەندەرىن سايلاۋ ۋچاسكەلەرىنە جەتكىزىپ، قازىرگى ۋاقىتتا ۋچاسكە ماڭايىندا قوعامدىق ءتارتىپتى جانە جول قاۋىپسىزدىگىن قامتاماسىز ەتۋ شارالارىن ۇيىمداستىرىپ جاتقانىن حابارلادى.