«پارتيالىق ەمەس بايقاۋ ورتالىعى» رەسپۋبليكالىق قوعامدىق بىرلەستىگىنىڭ جەرگىلىكتى وكىلدەرى اكىمدەر سايلاۋىندا زاڭ بۇزۋشىلىق تىركەلمەگەنىن ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«بۇگىن اۋىل اكىمدەرىنىڭ سايلاۋى ءوتىپ جاتىر. بارلىق اۋىلدا ەمەس، تەك اكىمدەردىڭ وكىلەتتىگى اياقتالعان اۋىلداردا عانا. ال ءبىز بايقاۋشىلاردىڭ جۇمىسىن ۇيىمداستىردىق. بايقاۋشىلاردىڭ كوپشىلىگىن جەرگىلىكتى تۇرعىندار اراسىنان تارتتىق. ولار بۇگىن بايقاۋشى بولعانىمەن، ەرتەڭ سول اۋىلدا قاراپايىم تۇرعىن رەتىندە ءومىر سۇرەدى. سوندىقتان سايلاۋدىڭ بۇرمالاۋسىز وتۋىنە مۇددەلى»، - دەپ جازدى "پارتيالىق ەمەس بايقاۋ ورتالىعى" شقو فيليالىنىڭ ءتوراعاسى اياۋجان ءاشىموۆا ءىnstagram پاراقشاسىندا.
وسى ورتالىق اتىنان №726 سايلاۋ ۋچاسكەسىندەگى جاعدايدى باقىلاعان انارحان قابلەتوۆا حالىقتىڭ بەلسەندى اتسالىسىپ جاتقانىن ايتادى.
«داۋىس بەرۋ جالعاسىپ جاتىر. ادامدار بەلسەندىلىك تانىتىپ، ءوز تاڭداۋلارىن جاساۋدا. ەشقانداي قۇقىق بۇزۋشىلىق ورىن العان جوق»، - دەيدى "پارتيالىق ەمەس بايقاۋ ورتالىعىنىڭ" وكىلى.
اقمولا وبلىسىنىڭ شورتاندى اۋدانىندا 9 ەلدى مەكەننىڭ اكىمى بۇگىنگى سايلاۋ ناتيجەسىندە بەلگىلى بولادى.
«شورتاندى اۋدانىندا بۇگىن ءتورت اۋىلدىق وكرۋگ – ونىڭ ىشىندە توعىز ەلدى مەكەننىڭ اكىمدەرى تىكەلەي سايلاۋ ارقىلى انىقتالادى. اۋداندىق اۋماقتىق سايلاۋ كوميسسياسىنىڭ مالىمەتىنشە، اۋدانداعى 4 سايلاۋ وكرۋگىندە 14 كانديدات تىركەلگەن. ونىڭ ىشىندە 4 ۇمىتكەر Nur Otan پارتياسىنىڭ اتىنان تۇسسە، 10 ۇمىتكەر ءوزىن-وزى ۇسىنعان. داۋىس بەرۋ نوۆوكۋبانكا، اندرەيەۆكا، پريگورودنىي جانە بوزايعىر اۋىلدىق وكرۋگتەرىندە وتۋدە»، - دەيدى شورتاندىداعى بەيتاراپ بايقاۋشىلار.
"پارتيالىق ەمەس بايقاۋ ورتالىعىنىڭ" شىعىس قازاقستان وبلىسى كاتونقاراعاي اۋدانىنداعى ورەل اۋىلدىق وكرۋگى بويىنشا بايقاۋشىسى اقبوتا شاكىرتوۆا داۋىس بەرۋ ءالى جالعاسىپ جاتقانىن، ەڭ باستىسى، بارلىق سانيتارلىق تالاپتاردىڭ ساقتالعانىن ايتادى.
«سايلاۋدا داۋىس بەرۋ – ءار ادامنىڭ قۇقىعى. ەل كەلەشەگىنە بەيجاي قارامايتىن ازامات تاڭداۋ جاسايدى. بۇل سايلاۋ باسقا سايلاۋلارعا قاراعاندا وزگەرەك. حالىق اۋىلدىڭ اكىمىن ءوزى سايلايدى. ەگەر ۇمىتكەرلەردىڭ قاي-قايسىسىنا دا كوڭىلى تولماسا، «بارىنە قارسىمىن» دەگەن باعانعا بەلگى قويۋعا مۇمكىندىگى بار. اۋىل تۇرعىندارى وزدەرى تانيتىن ۇمىتكەرگە داۋىس بەرىپ جاتىر»، - دەپ جازدى ماديار سەيسەكەيەۆ ەسىمدى باقىلاۋشى.
كوكشەتاۋ قالاسى ارداگەرلەر كەڭەسىنىڭ ءتوراعاسى شياپ الييەۆ تە سايلاۋشىلاردىڭ اراسىندا بولىپ، حالىقپەن سويلەسىپ قايتقانىن ايتادى.
«حالىقتىڭ بەلسەندىلىگى وتكەن سايلاۋلارعا قاراعاندا ەداۋىر ارتتى. سايلاۋ كۇنى اۋىل تۇرعىندارىنىڭ ساياسي ومىرگە بەلسەندىلىگى، ولاردىڭ ەڭ الدىمەن وزدەرىنىڭ ەلدى مەكەندەرىنىڭ بولاشاعىنا جاۋاپكەرشىلىكپەن قاراپ، ايقىن تاڭداۋ جاسايتىنىن مۇلتىكسىز اڭعارۋعا بولادى. ءوزىنىڭ 30 جىلدىق تاريحىندا تاۋەلسىز قازاقستان رەسپۋبليكاسى الەۋمەتتىك-ەكونوميكالىق جاعىنان بايگەگە كەيىن قوسىلسا دا، قاناتتى جۇيرىك تۇلپارداي ءبىراز ەلدەردى قۋىپ جەتىپ، ءتىپتى كەيبىرەۋلەرىنەن وزىق تۇراتىن جاعدايعا جەتتى. وسىنىڭ ءبىر ايعاعى رەتىندە جوعارى دەڭگەيدە ۇيىمداستىرىلعان بۇگىنگى ءوتىپ جاتقان ساياسي ناۋقان – اۋىلدار مەن اۋىلدىق وكرۋگتەر اكىمدەرىنىڭ تىكەلەي سايلاۋى»، - دەگەن قوعام قايراتكەرى 2021 جىلدىڭ 25 شىلدەسى تاريحتا ورنى ەرەكشە كۇن بولىپ قالاتىنىن ايتتى.
«ويتكەنى بۇل كۇن – اۋىل تۇرعىندارى ءوز ەلدى مەكەنىنىڭ كەلەشەگىنە، ادامي قاسيەتپەن بولاشاققا ۇلگى كورسەتىپ، قالاۋلىسىن دەپ تاۋىپ، داۋىس بەرگەن كۇن. بارلىق سايلاناتىن ۇمىتكەرلەرگە ساتتىلىك، ەگەمەندى ەلىمىزدى دامىتۋ جولىنداعى يگىلىكتى، اۋقىمدى ىستەرىنە ساتتىلىكتەر تىلەيمىن»، - دەيدى ارداگەرلەر كەڭەسىنىڭ باسشىسى.
ال اقمولا وبلىسى سايلاۋ كوميسسياسىنىڭ ءتوراعاسى ماناربەك ءسادۋوۆتىڭ ايتۋىنشا، وڭىردە سايلاۋشىلاردىڭ جالپى سانى - 100 111 ادام. ونىڭ ىشىندە بيۋللەتەن العانداردىڭ ۇلەسى - 8 826.
الماتى وبلىسىنىڭ «ازاماتتىق اليانسى» قاۋىمداستىعىنىڭ اتىنان №551 سايلاۋ ۋچاسكەسىندە بايقاۋشى بولىپ قاتىسىپ جاتقان جۇلدىز تەمىربەكوۆا داۋىس بەرۋ پروسەسى بارلىق تالاپتارعا ساي ءوتىپ جاتقانىن ايتقان.
«سايلاۋ ۋچاسكەسىنىڭ جۇمىسى قالىپتى ءجۇرىپ جاتىر. داۋىس بەرۋ پروسەسى بارلىق تالاپتارعا ساي جۇرگىزىلۋىن قاداعالايمىن جانە سىزدەرمەن سايلاۋ ۋچاسكەسىندەگى جاڭالىقتارمەن ءبولىسىپ وتىرامىن»، - دەيدى بايقاۋشى.