ەلىمىزدە «وتاۋ» باعدارلاماسى بويىنشا 15 مىڭ ءوتىنىم ءساتتى قابىلداندى.
بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى «وتباسى بانك» اق فيليالىنىڭ ديرەكتورى داناگۇل ءتۇسىپوۆا حابارلادى.
2024 جىلدىڭ 1 ناۋرىزىنان باستاپ قازاقستاندا «وتاۋ» جاڭا تۇرعىن ءۇي باعدارلاماسى ىسكە قوسىلدى. «وتاۋ» باعدارلاماسى جۇمىس ىستەيتىن جاستاردى، جاس وتباسىلاردى جانە «وتباسى بانكى» سالىمشىلارىن باسپانامەن قامتاماسىز ەتۋگە باعىتتالعان. وتىنىمدەر باسپانا ماركەت (otbasybank.kz) پورتالىندا ونلاين قابىلدانادى، دەپ حابارلايدى Almaty-akshamy.kz.
«قاتىسۋشىلار اراسىنداعى قاربالاستى الدىن-الۋ ءۇشىن وتىنىمدەردى قابىلداۋ مەرزىمىن بارىنشا قولايلى ەتتى. الەۋەتتى قاتىسۋشىلاردا ەكى اي ۋاقىت بار، ياعني 1 ناۋرىزدان 30 ساۋىرگە دەيىنگى (قوسا العاندا) ارالىقتا. بۇل رەتتە وسى كەزەڭدەگى ءوتىنىم بەرۋ كۇنى مەن ۋاقىتى ماڭىزدى ەمەس. سوندىقتان بانك سالىمشىلارى ءوز دەپوزيتتەرىن تولىقتىرىپ ۇلگەرە الادى، سالىمدارىن تۋىستارىنىڭ دەپوزيتتەرىمەن بىرىكتىرىپ، باعدارلامانىڭ شارتتارىمەن مۇقيات تانىسۋعا جانە سودان كەيىن عانا ءوتىنىم بەرۋگە ۋاقىتتارى بار»، – دەيدى داناگۇل ءتۇسىپوۆا.
سپيكەردىڭ ايتۋىنشا، 2024 جىلدىڭ 3 ساۋىرىندەگى جاعداي بويىنشا قابىلدانعان وتىنىمدەردىڭ جالپى سانى 20 662 جەتتى. ونىڭ ىشىندە 15 000-عا جۋىق ءوتىنىم ءساتتى قابىلداندى، 5 976 ءوتىنىم باعدارلاما شارتتارىنا سايكەس كەلمەگەندىكتەن قابىلدانبادى.
وتىنىمدەردىڭ 67%-ى 35 جاسقا دەيىنگى بانك سالىمشىلارىنان قابىلدانعانىن اتاپ وتۋگە بولادى.
«وتىنىمدەردىڭ باسىم بولىگى الماتىلىقتاردان - 3 087 ءوتىنىم، استانا تۇرعىندارىنان - 2 412 ءوتىنىم، باتىس قازاقستان وبلىسىنىڭ تۇرعىندارىنان - 1 304 ءوتىنىم، اقتوبە وبلىسىنىڭ تۇرعىندارىنان - 1 196 ءوتىنىم، شىمكەنت قالاسىنىڭ تۇرعىندارىنان - 940 ءوتىنىم قابىلداندى. ال جەتىسۋ - 213 ءوتىنىم، تۇركىستان - 178 ءوتىنىم، ۇلىتاۋ وبلىستارىنىڭ تۇرعىندارىنان - 93 ءوتىنىم جولدانعان»، - دەپ اتاپ ءوتتى د. ءتۇسىپوۆا.
وتىنىمدەردى قابىلداۋ مەرزىمى اياقتالعاننان كەيىن ءتىزىمدى سارالاۋ باستالادى. ياعني، قاتىسۋشىلاردىڭ وتىنىمدەرى ەڭ كوپ جينالعان ۇپايلار سانى بويىنشا بولىنەدى:
- سالىم بويىنشا سىياقى مولشەرى بويىنشا - ءاربىر 1 000 تەڭگە ءۇشىن 5 بالل؛
- سالىم مەرزىمى ءۇشىن – دەپوزيت قولدانىلعان ءاربىر جىل ءۇشىن 5 بالل؛
- تىركەلگەن نەكە ءۇشىن - 10 بالل؛
- بالالار ءۇشىن - ولاردىڭ سانىنا قاراماستان 50 بالل.
ەگەر ەكى قاتىسۋشىنىڭ بالدار سانى بىردەي بولسا، وندا تىزىمگە ەنگىزۋدەگى باسىمدىق سالىم سوماسى كوبىرەك جانە جيناقتاۋ مەرزىمى ۇزاعىراق ادامدارعا بەرىلەدى.
سارالاۋدان كەيىن كليەنتتەر «وتاۋ» باعدارلاماسىنا ەنگەندەردىڭ ءتىزىمىن بانك سايتىنان كورە الادى. ولارعا كرەديتتىك ءوتىنىم بەرۋ ءۇشىن شامامەن 40 جۇمىس كۇنى بەرىلەدى.
«وتباسى بانك» وسى ۋاقىتقا دەيىن قولدانىستاعى تۇتىنۋشىلىق كرەديتتەردى وتەپ ۇلگەرۋگە كەڭەس بەرەدى، سوندا كرەديتتى ماقۇلداۋ مۇمكىندىگى كوبىرەك بولادى. تولەم قابىلەتتىلىگىن ەسەپتەۋ كەزىندە سوڭعى 6 ايداعى رەسمي تابىسى عانا ەمەس، سونىمەن قاتار وتباسىنا جۇمسالاتىن مىندەتتى شىعىندار، سونداي-اق ناقتى كرەديتتەر بويىنشا تولەمدەر ەسكەرىلەدى.
ەگەر باعدارلاماعا قاتىسۋشى كرەديت بويىنشا وڭ ماقۇلداۋ السا، وندا ونىڭ باسپانا ىزدەۋ ءۇشىن 6 اي ۋاقىتى بولادى.
الماتىدا، استانادا، شىمكەنتتە جانە وبلىس ورتالىقتارىندا تەك باستاپقى نارىقتاعى تۇرعىن ءۇيدى، ونىڭ ىشىندە قتك كەپىلدىگىمەن ۇلەستىك قاتىسۋ شارتى بويىنشا نەمەسە ساقتاندىرۋ قۇرالىن پايدالانا وتىرىپ ساتىپ الۋعا بولادى. بارلىق باسقا ەلدى مەكەندەردە كەز كەلگەن تۇرعىن ءۇيدى ساتىپ الۋعا بولادى.
باعدارلاماعا قاتىسۋشى باستاپقى نارىقتاعى تۇرعىن ءۇيدى otbasybank.kz پورتالىنان عانا ساتىپ الا الادى. بۇل وپسيا جاڭا تۇرعىن ءۇي باعدارلاماسىنىڭ باستالۋى اياسىندا تۇرعىن ءۇي باعاسىنىڭ جاساندى وسۋىنە جول بەرمەۋگە ارنالعان.
وسى پلاتفورمادا ورنالاستىرار الدىندا ءاربىر نىسان تۇرعىن ءۇيدىڭ اعىمداعى نارىقتىق باعاسى نەگىزىندە قۇنىن كەلىسۋ پروسەسىنەن وتەتىن بولادى. ەگەر ول نارىققا سايكەس كەلسە، وندا قۇرىلىس سالۋشىمەن 1 شارشى مەترگە باعانى بەلگىلەي وتىرىپ، وسى تۇرعىن ءۇيدى ساتۋ تۋرالى كەلىسىم جاسالادى.
«اۋدان ورتالىقتارىندا، مونوقالالاردا جانە اۋىلداردا ساتىپ الۋعا بولاتىن كەز كەلگەن تۇرعىن ءۇي العاشقى نارىقتان (ەگەر ول ەلدى مەكەندە بولسا) جانە قايتالاما نارىقتان پاتەر، سونداي-اق جەكە ءۇي ساتىپ الۋعا بولادى. نىساندار بانكتىڭ كەپىل ساياساتىنا سايكەس كەلۋى كەرەك. ياعني تۇرعىن ءۇي 1964 جىلدان كەيىن جانە بەلگىلى ءبىر ماتەريالداردان سالىنۋى كەرەك. مىسالى، بانك قاڭقالى-قامىستى قۇرىلىستاردى كەپىل رەتىندە قاراستىرمايدى»، - دەپ ءتۇسىندىردى سپيكەر.
الماتى مەن استاناداعى ماكسيمالدى كرەديت سوماسى - 30 ملن تەڭگەگە دەيىن، قالعان وڭىرلەردە - 18 ملن تەڭگەگە دەيىنگى سوممانى قۇرايدى.
«وتاۋ» باعدارلاماسى بويىنشا ءبىر كرەديت اياسىندا تۇرعىن ءۇي ساتىپ الۋ جانە جوندەۋ ءۇشىن اقشا الۋعا بولادى. ءبىراق كرەديتتىڭ جالپى سوماسى رۇقسات ەتىلگە ەڭ جوعارعى سومادان اسپاۋى ماڭىزدى - الماتى، استانا قالالارى ءۇشىن 30 ميلليون تەڭگەگە دەيىن جانە قالعان وڭىرلەر ءۇشىن 18 ميلليون تەڭگەگە دەيىن.
جوندەۋگە ارنالعان قارىز سوماسى كرەديتتىڭ جالپى كولەمىنىڭ 30%-ىنان اسپاۋى ءتيىس.
«وتاۋ» باعدارلاماسى بويىنشا كرەديت تالاپتارى:
- باستاپقى جارنا - 20%-دان باستاپ؛
- كرەديت بويىنشا مولشەرلەمە - 9% (جتسم 9،2%-دان باستاپ)؛
- كرەديت مەرزىمى - 19 جىلعا دەيىن.
«وتاۋ» باعدارلاماسىنا كەلەسى تۇلعالار قاتىسا الادى:
1. وتباسى بانك سالىمشىلارى، ونىڭ ىشىندە تۇرعىن ۇيگە كەزەگىندە تۇرعان ازاماتتار دا؛
2. وتباسى بانكتە كەمىندە 18 اي مەرزىمىندەگى دەپوزيتى بار ادامدار؛
3. جيناق شوتىندا ءوتىنىم بەرۋ ساتىندە كەمىندە 1 ملن تەڭگە جيناق سوماسى بار ادامدار؛
4. قاتىسۋشىنىڭ جاسى - 18-دەن 63 جاستى قوسا العانعا دەيىن؛
5. باعدارلاماعا قاتىسۋشىنىڭ جانە ونىڭ وتباسى مۇشەلەرىنىڭ سوڭعى 5 جىل ىشىندە مەنشىگىندە جىلجىمايتىن مۇلىك (پاتەر، ءۇي، كوممەرسيالىق جىلجىمايتىن مۇلىك، كەز كەلگەن نىسانالى ماقساتتاعى جەر ۋچاسكەسى) بولماۋى ءتيىس؛
6. الماتى مەن استانادا تۇرعىن ءۇي ساتىپ الۋ كەزىندە - وسى قالالاردا تۇراقتى تىركەۋ بولۋى ءتيىس.
"وتاۋ" باعدارلاماسىن ىسكە اسىرۋدىڭ بارىنشا اشىقتىعى ءۇشىن ونىڭ قاتىسۋشىلارىنىڭ ءتىزىمى (كرەديت الۋشىلاردىڭ كەلىسىمىمەن) وتباسى بانكتىڭ سايتىندا جاريالاناتىن بولادى. ءار اداموتىنىمدەردى ىرىكتەۋ جانە بالداردى ەسەپتەۋ ناتيجەلەرىمەن otbasybank.kz پورتالىندا تانىسا الادى.