Almaty-akshamy.kz سايتىندا بۇگىن جاريالانعان جاڭالىقتارعا شولۋ – كۇن كەرۋەنى
ۇلت باسىلىمى – شىنايى اقپارات پەن ساپالى ساراپتامانىڭ قاينار كوزى
ەلىمىزدە العاش رەت 2 اقپان – ۇلتتىق باسىلىم كۇنى اتاپ ءوتىلدى. وسىعان وراي مەملەكەت باسشىسى باسپا ءسوز قىزمەتكەرلەرىن ۇلتتىق باسىلىم كۇنىمەن قۇتتىقتادى.
«سوناۋ 1913 جىلى، ءدال وسى كۇنى ەلىمىزدىڭ باسپا ءسوز سالاسىنىڭ باستاۋىندا تۇرعان «قازاق» گازەتىنىڭ العاشقى سانى جارىق كوردى. حالقىمىزدىڭ ءبىرتۋار پەرزەنتتەرى – الاش ارىستارى شىعارعان بۇل باسىلىم سىندارلى ساتتەردە ۇلتتى ۇيىستىرۋعا ايرىقشا ىقپال ەتتى. ءسوز بوستاندىعىنا ادالدىعىنان اينىماعان باسىلىمدار ءاردايىم شىنايى اقپاراتتىڭ جانە ساپالى ساراپتامانىڭ قاينار كوزى بولىپ قالا بەرەدى. گازەت-جۋرنالدار زامانا تىنىسىن ءدوپ باسىپ، مەملەكەت پەن قوعامداعى قوردالانعان ماسەلەلەردى كوتەرەدى، ءتۇرلى كوزقاراستاعى وي-پىكىرلەردى جارىققا شىعارادى. سونداي-اق جالپى ادامزاتقا ورتاق ىزگى قۇندىلىقتاردى دارىپتەيدى. باسپا ءسوز قىزمەتكەرلەرى كاسىبي بىلىكتىلىكتىڭ، وتانشىلدىق پەن جاۋاپكەرشىلىكتىڭ وزىق ۇلگىسىن كورسەتىپ كەلەدى»، دەدى قاسىم-جومارت كەمەل ۇلى توقايەۆ.
سيمۆولدىق ءمانى بار مەرەكە
مادەنيەت جانە اقپارات ءمينيسترى ايدا بالايەۆا دا قالام ۇستاعان قاۋىمدى اتالمىش مەرەكەمەن قۇتتىقتادى.
«قازاق ءباسپاسوزىنىڭ تاعىلىمعا تولى تاريحىندا بۇل كۇننىڭ ماڭىزى بولەك. سەبەبى ءدال وسى كۇنى ءاليحان بوكەيحان ۇلى، احمەت بايتۇرسىن ۇلى، ءمىرجاقىپ دۋلات ۇلى سەكىلدى ۇلت زيالىلارىنىڭ ەسىمىمەن ۇشتاسىپ جاتقان «قازاق» گازەتىنىڭ العاشقى سانى جارىق كوردى. سوندىقتان، وتكەن جىلى ۇكىمەت قاۋلىسىمەن 2 اقپان – ۇلتتىق باسىلىم كۇنى بولىپ بەكىتىلۋىنىڭ وزىندىك سيمۆولدىق ءمانى بار دەپ بىلەمىز»، دەدى مينيستر قۇتتىقتاۋىندا.
بيىلعى ەسەپ بويىنشا قازاقستاندا 5 804 ب ا ق تىركەلگەن، ونىڭ 3 985 – ءى مەرزىمدى باسپا ءسوز باسىلىمى، 212ء-ى تەلەارنا، 90-ى راديو، 1 222ء-ى اقپاراتتىق اگەنتتىكتەر جانە جەلىلىك باسىلىمدار.
قالتىراعان بىشكەك
بۇگىن تۇندە بىشكەكتەگى جىلۋ ورتالىقتارىنىڭ بىرىندە اپات بولعان. الدىن الا مالىمەت بويىنشا، قازاندىقتاردىڭ ءبىرى جارىلعان. جارىلىس سەبەبى ازىرگە بەلگىسىز. قالانىڭ كوپتەگەن تۇرعىنى ىستىق سۋسىز قالعان.
بالانى باسىپ قالعان...
4 ءبۇلدىرشىن شكافتىڭ استىندا قالىپ قويىپ، جاراقات الدى. وقيعا ورالداعى بالاباقشادا بولعان. "Sabi" جەكە بالاباقشاسىندا بالالاردىڭ ۇستىنە بيىكتىگى ەكى مەتردەي شكاف قۇلاپ، 4 بالا استىندا قالىپ قويعان. بالالاردى قالقالايمىن دەپ اياعىن جاراقاتتاعان 47 جاستاعى تاربيەشىگە امبۋلاتوريالىق ەم تاعايىندالدى. وقيعانىڭ ءمان-جايى انىقتالىپ جاتىر.
جولاۋشىلاردىڭ جولى بولماي تۇر
سەبەبى، ءۇش وبلىستىڭ جولى اۋا رايىنىڭ قولايسىزدىعىنا بايلانىستى جابىلىپ، 4 ۋچاسكەدە كولىك قوزعالىسىنا شەكتەۋ ەنگىزىلدى. جولداردى كۇتىپ-ۇستاۋعا 893 ارنايى تەحنيكا مەن 1145 جولشى جۇمىلدىرىلدى.
پوليسيا ەسكەرتەدى!
الماتى پوليسياسى قاردىڭ قالىڭ جاۋۋىنا بايلانىستى كولىك جۇرگىزۋشىلەرىنە ۇندەۋ جاسادى.
ءتارتىپ ساقشىلارى جۇرگىزۋشىلەردى قاۋىپسىزدىك شارالارىن كۇشەيتۋگە جول قوزعالىسى ەرەجەلەرىن قاتاڭ ساقتاۋعا، جۇرگىزۋشى مادەنيەتىن كورسەتۋگە شاقىرادى.
جارتى عاسىردان كەيىن جارىق كورگەن...
ايگىلى حالىق گەولوگى، كەن بىلگىرى قوسىم پىشەنبايەۆتىڭ 180 جىلدىعىنا ارنالعان «قوسىمنىڭ تاعدىرى» كىتابىنىڭ تۇساۋى كەسىلدى. كىتاپتىڭ اۆتورى – باياناۋىلدىق ولكەتانۋشى الەكساندر چەركاشين. كىتاپتىڭ قولجازباسى 1972 جىلى باياناۋىل كەنتىندە باسپا ماشينكاسىنا تۇسىرىلگەن. بۇل كىتاپتىڭ جازىلۋىنا اكادەميك قانىش يمانتاي ۇلى ساتبايەۆ تۇرتكى بولعان. قولجازبا كۇيىندە قازكسر جازۋشىلار وداعىنىڭ كوركەمدىك كەڭەسىنە جىبەرىلىپ، بەلگىلى سەبەپتەرمەن كەيىن قايتارىلعان.
ادامدى چيپ باسقارا ما؟
يلون ماسكتىڭ Neuralink كومپانياسى ادامنىڭ ميىنا تۇڭعىش رەت يمپلانت ورناتتى. چيپ ورناتۋ وپەراسياسى ءساتتى وتكەن. ماسكتىڭ جازۋىنشا، ورناتىلعان چيپ جاقسى ناتيجە كورسەتىپ جاتىر.
ءچيپتىڭ كومەگىمەن مۇمكىندىگى شەكتەۋلى ازاماتتار كومپيۋتەر نەمەسە سمارتفوندى ويمەن باسقارا الادى. بۇعان قوسا، يمپلانت اياق پەن قول پروتەزىن باسقارۋعا دا كومەكتەسپەك.
«ايەلدەردى ەركەكتەردەن كوپ دەيدى...»
جوعارى سوت كەڭەسىنىڭ ءتوراعاسى دەنيس ءشيپپتىڭ ايتۋىنشا، نازىك جاندى سۋديالاردىڭ سانى ەرلەرمەن سالىستىرعاندا كوبىرەك ەكەن. پرەزيدەنت قابىلداۋىندا بولعان ءتوراعا سۋديالار كورپۋسىنىڭ قازىرگى جاي-كۇيى جانە الداعى كەزەڭگە ارنالعان جوسپارى جونىندە باياندالدى.
«گەندەرلىك تۇرعىدان ايەل سۋديالاردىڭ سانى ەر ادامدارمەن سالىستىرعاندا 172 ادامعا كوپ. سۋديالاردىڭ ورتاشا جاس مولشەرى – 46 جاس، ال ەڭبەك ءوتىلى – 13 جىل»، دەدى ءتوراعا.
iPhone-نىڭ نە جازىعى بار؟
الما بەلگىسى بار تەلەفون يەلەرى نەلىكتەن جەر سىلكىنىسى تۋرالى حابارلاما المادى؟ مۇنى تۇسىندىرگەن قىرعىز رەسپۋبليكاسى مينيسترلەر كابينەتى ءتوراعاسىنىڭ ءبىرىنشى ورىنباسارى ادىلبەك قاسىمالييەۆتىڭ ايتۋىنشا، Apple ءبىزدىڭ ەلدەردى اپاتتى ەسكەرتۋ قىزمەتىنە قولجەتىمدى ەلدەر تىزىمىنە قوسپاعان.
«بۇل قاراپايىم فۋنكسيا سياقتى كورىنەدى، ءبىراق ول ادامداردىڭ ءومىرىن ساقتاپ قالۋى مۇمكىن. ەاەو ەلدەرىنە ەڭ الدىمەن Apple، Google جانە Microsoft سياقتى تەحنولوگيالىق كومپانيالارمەن ديالوگ قاجەت»، دەدى ادىلبەك قاسىمالييەۆ.