الماتىدا جان-جاقتى جوسپارلاۋدىڭ جاڭا جوبالارىنا سايكەس بازارلار اۋماقتارى كوگالداندىرىلادى
قالالىق جوسپارلاۋ جانە ۋربانيستيكا باسقارماسى اتاپ وتكەندەي، جان-جاقتى جوسپارلاۋدىڭ جاڭا جوبالارى بويىنشا ساۋدا كەڭىستىكتەرىن ايتارلىقتاي جاڭارتۋ قاراستىرىلعان.
مىسالى، المالى اۋدانىندا روزىباكييەۆ كوشەسىنىڭ بويىنداعى «تاستاق» جانە «كوتەرمە ساۋدا» بازارلارى مودەرنيزاسيالانادى. جەتىسۋ اۋدانىندا سولتۇستىك اينالما جولى بويىنداعى بازارلاردى جاڭعىرتۋ، سونداي-اق سۋ قورعاۋ بەلدەۋلەرىن اباتتاندىرۋ جانە تازارتۋ كوزدەلگەن. بۇل شارالار ساۋدا الاڭدارىنىڭ ساپاسىن ەداۋىر ارتتىرادى جانە كەلۋشىلەر مەن كاسىپكەرلەر ءۇشىن قولايلى جاعداي جاسايدى.
جالپى، ساياباقتاردى، سكۆەرلەردى، بۋلۆارلاردى قوسا العاندا، جالپى پايدالانىمداعى جاسىل جەلەكتەر الاڭىن 2030 جىلعا دەيىن 3 ەسە ۇلعايتۋ كوزدەلگەن.
سونىمەن قاتار، جۇردەك كولىك قاڭقاسىن جانە ءوزارا بايلانىستى كوشەلەر جەلىسىن ەنگىزۋ ەسەبىنەن قالانىڭ بارلىق اۋداندارى بىر-بىرىنە ينتەگراسيالاناتىن بولادى. قالا تۇرعىندارى قالانىڭ كەز كەلگەن جەرىنە وڭاي بارا الادى. مۇنداي قوزعالىستاردىڭ دالىزدەرى بيزنەس ءۇشىن، ونىڭ ىشىندە ساۋدا سالاسىندا دا تارتىمدى بولادى.
وسىلايشا، جان-جاقتى جوسپارلاۋ جوبالارى تۇراقتى جانە فۋنكسيونالدى قالالىق كەڭىستىكتى قۇرۋعا باعىتتالعان. ولار قالا قۇرىلىسىن ايماقتارعا ءبولۋدىڭ، قىزىل سىزىقتاردىڭ، حالىققا الەۋمەتتىك، مادەني جانە كوممۋنالدىق قىزمەت كورسەتۋ وبەكتىلەرىن ورنالاستىرۋ ءۇشىن اۋماقتاردى رەزەرۆتەۋدىڭ، كوشە-جول جەلىسىن ۇيىمداستىرۋدىڭ، ينجەنەرلىك كوممۋنيكاسيالاردى تراسسالاۋدىڭ، اۋماقتاردى اباتتاندىرۋ مەن كوگالداندىرۋدىڭ نەگىزگى باعىتتارىن بەلگىلەيدى.