Shymkenttiń 90 jastaǵy turǵyny alaıaqtardyń arbaýyna túsip, jarty mıllıon teńgesinen aıyrylyp qaldy. Qart kisige belgisiz tulǵa qońyraý shalyp, ózin polısıa qyzmetkeri retinde tanystyryp, kelini jol-kólik oqıǵasyn jasaǵanyn habarlaǵan. Alaıaq máseleni belgili bir somamen sheshýge bolatynyn jáne zeınetkerden ol aqshany kýrer alyp ketetindigin aıtqan. Týysyna kómektesý úshin qart ana alaıaqtarǵa barlyq jınap-tergen qarajatyn, ıaǵnı jarty mıllıon teńgesin berip jibergen.
İzdestirý is-sharalarynyń barysynda tártip saqshylary beınebaqylaý kameralarynyń kómegimen jábirlenýshiniń úıinen qolma-qol aqshany alý úshin kelgen tulǵany anyqtap, ustady. Ol 33 jastaǵy qala turǵyny bolyp shyqty. Óz jaýabynda ustalǵan er adam messendjer arqyly alǵan nusqaýǵa sáıkes áreket etkenin jetkizdi. Alǵan aqshany belgili bir shotqa aýdarýǵa kelisken ol shartty oryndamaı, alaıaq “jumys berýshisin” aldap ketken eken.
Qazirgi tańda qylmysqa qatysy bar basqa da tulǵalardy anyqtaýǵa baǵyttalǵan tergeý jumystary júrgizilip jatyr. Quqyq qorǵaýshylar azamattarǵa alaıaqtyqtyń osy túri týraly eske salady.
Polısıa qyzmetkerleri azamattardy alaıaqtardyń arbaýyna túsip qalmaýǵa shaqyrady:
- Alaıaqtar ózderin polıseıler retinde tanystyryp, týysyńyzdyń qıyndyqqa tap bolǵanyn habarlap, máseleni belgili bir aqsha qarajaty sheshetinin aıtýy múmkin. Mundaı jaǵdaıda birden polısıanyń “102” nómirine qońyraý shalyp, aqparatty tekserińiz.
- Úreılenbeńiz, ásirese beıtanys adamdarǵa aqsha aýdarmańyz.
Bul jaǵdaı azamattardy saq bolýǵa jáne alaıaqtardyń arbaýyna túspeýge shaqyrady. Quqyq qorǵaý organdarynyń eskertýlerin eskerip, kúdikti jaǵdaılarda dereý polısıaǵa habarlasý qajet.