2024 jyldan bastap zeınetaqy taǵaıyndaý prosesi ózgertilip, múldem jańa formatta júrgiziledi. Bul týraly Úkimet otyrysynda Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy almaty-akshamy.kz.
"Sıfrlyq servıster byltyr engizilse de halyqtyń úlken suranysyna ıe bolyp otyr. Ádilet mınıstrligimen senimhattardyń 5 paıyzyn sıfrlyq formatqa kóshirdik. Bul jumys jalǵasýda. Avtokólikti tirkeýdiń 55 paıyzy onlaın formatta jasalady. Bul - İshki ister mınıstrligi men «Azamattarǵa arnalǵan úkimet» korporasıasynyń ortaq jumysy. Ipotekanyń 67 paıyzy bankterde onlaın tirkeledi. «Elektrondyq úkimet» ár azamatty týǵan kúnimen quttyqtaýdy nemese qujattardyń merzimi aıaqtalyp qalǵany týraly aldyn-ala habarlaýdy úırendi», - dedi mınıstr.
Onyń atap ótýinshe, munymen shektelmeı, basqa salalardaǵy suranysqa ıe qyzmetterdi de sıfrlandyrý qolǵa alynǵan.
«Mysaly, zeınetaqy taǵaıyndaý prosesi ózgertilip, kelesi jyly múldem jańa formatta júrgizilmek. Sonymen qatar jumysqa turý kezinde talap etiletin 12 túrli anyqtamalardy joıý, ınternetke qosylý, deklarasıa tapsyrý, balabaqshaǵa kezekke turý sıaqty jobalar ázirlenip jatyr. Jobalardy sapaly jáne ýaqytyly engizýdi memlekettik organdardan suraımyz», - dedi Baǵdat Mýsın.