BJZQ ókilderi Almaty qalasynyń óńirlik komýnıkasıalar qyzmetiniń brıfıńine qatysty, olar zeınetaqy jınaqtaý júıesinde qandaı ózgerister kútiletini jáne zeınetaqy jınaqtaryn turǵyn úı satyp alýǵa nemese emdelýge paıdalaný úshin qaıda júginý kerektigi týraly túsinikteme berdi, dep habarlaıdy almaty-akshamy.kz
Jańa kodeks sheńberinde zeınetkerlerdiń eńbek sińirgen jyldary boıynsha zeınetaqy qoryndaǵy zeınetaqy jınaqtarynyń barlyq somasyn turǵyn úı jaǵdaılaryn jaqsartý, emdelýge aqy tóleý úshin paıdalaný múmkindigi kózdelgen.
Atap ótetin bolsaq, eńbek sińirgen jyldary boıynsha zeınetkerlerge áskerı qyzmetshiler (merzimdi qyzmettegi áskerı qyzmetshilerden basqa), arnaýly memlekettik jáne quqyq qorǵaý organdarynyń, memlekettik feldegerlik qyzmettiń qyzmetkerleri jáne áskerı qyzmette, arnaýly memlekettik jáne quqyq qorǵaý organdarynda, memlekettik feldegerlik qyzmette keminde jıyrma bes jyl eńbek sińirgen jyldary bar ózge de adamdar jáne qyzmetten bosatylǵan kezde QR zańnamasynda belgilengen qyzmette bolýdyń shekti jasyna jetken jandar jatady.
BJZQ-da mindetti kásiptik zeınetaqy jarnalary esebinen qalyptastyrylǵan zeınetaqy jınaqtary bolǵan jaǵdaıda, eńbek sińirgen jyldary boıynsha zeınetkerler olardy jalpyǵa birdeı belgilengen zeınet jasyna tolǵan kezde erler úshin 63 jas, áıelder úshin 61 jas ala alady.
«Barlyq basqa zeınetkerler, eger olardyń zeınetaqy tólemderiniń mólsheri 40%-dan tómen emes deńgeıdegi tabysty almastyrý koefısıentin qamtamasyz etse, turǵyn úı jaǵdaılaryn jaqsartý jáne (nemese) emdelý maqsattaryna mindetti zeınetaqy jarnalary esebinen qalyptastyrylǵan ózderiniń zeınetaqy jınaqtarynyń 50%-na deıin paıdalaný quqyǵyn saqtaıdy. Almastyrý koefısıentin esepteý Úkimet aıqyndaǵan tártippen júrgiziledi. Koefısıentti esepteý kezinde zeınetkerdiń zeınetke shyqqan kúniniń aldyndaǵy, biraq respýblıka boıynsha ortasha aılyq tabysynan aspaıtyn tabysy eskeriledi», - dedi «BJZQ» AQ basqarmasynyń tóraǵasy Janat Qurmanov.
Turǵyn úı jaǵdaılaryn jaqsartý maqsatynda BJZQ-dan birjolǵy zeınetaqy tólemderin alý úshin "Otbasy banki" turǵyn úı qurylys jınaq banki" AQ-ǵa (enpf-otbasy.kz portaly arqyly) nemese ekinshi deńgeıdegi "Qazaqstan Halyq banki" AQ, "Altyn Bank" AQ, "Bank SentrKredıt" AQ, "Bank Frıdom Fınans" AQ sıaqty bankterge júgingen jón. Al emdelýge aqy tóleý maqsatynda - "Otbasy banki" turǵyn úı qurylys jınaq banki" AQ-ǵa ǵana júginýge bolady.