Qazaqta umyt bola bastaǵan qolóner túrleri kóp. Solardyń biri – dástúrli biz keste tigý óneri. Qazaqpen birge jasasqan tól ónerimizdi basqa qyrynan tanytyp, zamanaýı ónermen ushtastyryp júrgen sýretshi Zeınelhan Muhamedjanmen áńgimelesýdiń sáti tústi.
Dástúrli biz keste tigý óneriniń negizin qalaýshy Zeınelhan aǵanyń aıtýynsha, keıingi kezderi biz keste jaqsy suranysqa ıe bolyp keledi. Búginde bul salaǵa qyzyǵatyn, osy ónermen aınalysqysy keletin jastar da kóbeıgen.
– Meniń biz kestemen aınalysqanyma qyryq jylǵa jýyqtap qaldy. Halqymyzdyń biz kestesi ǵasyrlar boıy qazaqpen birge jasady. Baıyrǵy óner óte kúrdeli qolóner túrleriniń biri. Qazaq halqynyń tarıhynda beıbit ómirden góri, jaýgershilik, arpalysta ótken kezeń kóp bolǵan. Kóshpeli zamanda, qazaqtyń basynan ótken san qıly qıyndyq salt dástúrine, mádenıeti men ónerine de zıanyn tıgizdi. Keıbiri ózgeriske ushyrady, keıbiri umytyldy. Solardyń biri – biz keste óneri. Kóship-qonyp júrgen qazaq qundy, asyl dúnıeleriniń birazyn joǵaltty. Odan berirekte, Keńes úkimeti tusynda qazaq elinde kúndelikti qoldanystan shyǵyp, halyq bizben keste tigýdi umyta bastady. Onyń ornyn arzanqol dúnıelermen almastyrdy. Jasandy kilemsheler, arnaıy tehnıkamen toqylǵan alashalar shyǵa bastady. Óner quldyrap, sheberler azaıdy.
Toqsanynshy jyldary qolónermen aınalysa bastaǵan shaǵymda qolym bos kezde, keste tigetinmin. Qolyma jıi biz alyp, keste tigip júrgendikten, osy ónerge qyzyǵýshylyǵym arta bastady. Sóıtep, kestemen jaqsy bir dúnıe jasap kórsem degen oı keldi. Alǵash ret kishkentaı dúnıe tigip, týyndymdy 1986 jyly Mońǵolıadaǵy jas sýretshiler kórmesine usyndym. Biz kestemen jasaǵan alǵashqy týyndym bolsa da, sol kezde óner zertteýshileri tarapynan qyzyǵýshylyq boldy. Erekshe tehnıkamen oryndalǵan sol jumysym kóptiń kózine tústi. Jaqsy pikirler aıtyldy. Sodan bastap, óner jolyndaǵy negizgi, naqty baǵytym aıqyndaldy. Oǵan deıin aınalysqan qolónerdiń basqa túrlerin syryp qoıyp, óte sırek kezdesetin biz keste tigý ónerimen aınalysa bastadym. Sodan beri, mine, 40 jylǵa taıap qalypty. Osy ýaqyt aralyǵynda qanshama dúnıeler jasaldy.
Qazaqtyń sándik-qoldanbaly óneri asqan shydamdylyqty, eptilik pen sheberlikti talap etetin kúrdeli jumys, – deıdi Zeınelhan Muhamedjan.
Qazaqstan Sýretshiler Odaǵynyń múshesi, kórkem biz kesteniń negizin qalaýshy Zeınelhan aǵadan alǵan suhbattyń tolyq nusqasyn Almaty aqshamy gazetiniń aldaǵy nómirlerinen oqı alasyzdar...
Jazyp alǵan – Gúljanat SEMBAEVA.