Prezıdent shetelden qaıtarylǵan aktıvter qaıda jumsalatynyn aıtty
Úkimet shetelge zańsyz shyǵarylǵan kapıtaldy qaıtarý úshin qajetti zań jobasyn ázirleıdi. Bul týraly Memleket basshysy Qasym-Jomart Toqaev Prezıdentti ulyqtaý rásiminde aıtty, dep habarlaıdy QazAqparat tilshisi.
«Biz ádildikti qalpyna keltirip, elden zańsyz shyǵarylǵan barlyq aktıvti qaıtarýǵa tıispiz. Bul úshin Úkimet zańsyz shyǵarylǵan kapıtaldy qaıtarý úshin qajetti rásimderdi retteıtin zań jobasyn ázirleıdi. Sonymen qatar zań jobasy ádiletsiz baıýǵa jáne aktıvterdi zańsyz shyǵarýǵa yqpal etetin sebepter men sharttardy joıýǵa baǵyttalady», - dedi Qasym-Jomart Toqaev.
Sonymen birge, Prezıdent qaıtarylǵan barlyq qarajat azamattardyń ıgiligine jumsalýy qajettigin basa aıtty.
«Bul qarjyny joǵary tehnologıaly óndiris oryndaryn ashýǵa, mektepter men aýrýhanalar salýǵa, áleýmettik jobalardy júzege asyrýǵa paıdalaný kerek. Tıisti Jarlyqqa búgin qol qoıamyn. Jaqyn arada aýqatty kásipkerler halyqtyń ıgiligi úshin ózderiniń áleýmettik jaýapkershiligin jandandyrady dep oılaımyn», - dedi Q. Toqaev.