Sot otyrysy barysynda sottalýshy B. óz kinásin moıyndady.
Memleketke keltirilgen zalal 837 mln. teńgeni qurady, onyń 100 mln. teńgesi óteldi, dep habarlaıdy Almaty-akshamy.kz
Almaty qalalyq №2 Bostandyq aýdandyq sotynda oryndalmaǵan jumystarǵa shot-faktýralardy jazyp bergeni úshin kináli dep tanylǵan azamatqa qatysty qylmystyq is qaraldy.
Sot 2017 jyldyń qazan aıy men 2020 jyldyń jeltoqsan aralyǵynda B. esimdi sottalýshynyń K., P., M., T. esimdi tanystarynyń atyna 4 kásiporyndy tirkegenin anyqtady.
Bul kásiporyndar naqty jumystar jasamaı, jalǵan mámile jasaý arqyly jeke kásipkerlik sýbektileri - kontragentterdiń qarajatyn zańdy aınalymnan shyǵarýmen aınalysqan.
Aýdandyq sottyń baspasóz qyzmetiniń málimetinshe, sottyń úkimi boıynsha sottalýshy B. is júzinde oryndalmaǵan jumystarǵa shot-faktýralardy jazǵany úshin kináli dep tanyldy. Oǵan qarjy qurylymdarynda materıaldyq jaýapty laýazymdardy atqarý quqyǵynan 5 jyl merzimge aıyra otyryp, 3,6 jyl bas bostandyǵynan aıyrý jazasy taǵaıyndaldy. Úkim zańdy kúshine engen joq.