Almatyda ákim Erbolat Dosaevtyń turǵyndar ótinishine nazar aýdarǵannan soń zańsyz karerler jabyldy, dep habarlaıdy Almaty-akshamy.kz.
2022 jylǵy 16 mamyrda ákimniń Naýryzbaı aýdanynyń halqymen kezdesýi barysynda turǵyndar Erbolat Dosaevtan Almaty oblysy Qarasaı aýdanynyń aýmaǵyndaǵy karerdiń ıelerine shara qoldanýdy, olardyń turǵyn úılerge jaqyn ornalasqanyn ári únemi shý men shań-tozańnan kóz ashpaıtyndaryn aıtyp shaǵymdanǵan edi.
«Bizdi Aqjar shaǵynaýdanyndaǵy jumys istep turǵan karer tolǵandyrady, ol táýlik boıy jumys isteıdi. Bul óte shýly jáne shańnan kóz ashpaımyz. Karer Qarasaı aýdanyna qaraıdy, biraq biz – Naýryzbaı aýdanynyń turǵyndarymyz. Karer men turǵyn úıler arasyndaǵy qashyqtyq - 10-15 metr. Jer qoınaýyn paıdalaný týraly zańǵa sáıkes karer keminde 500 metr qashyqtyqta bolýy kerek – bul sanıtarlyq-qorǵaý aımaǵy. Biz karer qyzmetkerlerine júgindik, olar sizge habarlasýdy aıtty. Biz karerdiń lısenzıasyn qaıtaryp alýdy qalaımyz jáne sizdiń tarapyńyzdan túngi ýaqytta karerdiń jumysyn shekteýge kómektesýińizdi ótinemiz», – dedi aýdan turǵyndary.
«Atalǵan karer Almaty men Almaty oblysynyń túıisken jerinde ornalasqan. Men oblys ákiminen karerdiń bolashaǵy jáne onymen ne isteýge nıetti ekenderin naqtylaımyn. Árıne, jaýap beremin. Al, Naýryzbaı aýdanynyń ákimine karerdiń túngi ýaqyttaǵy jumysyna qatysty máseleni sheshýdi tapsyramyn», – dep jaýap berdi Almaty ákimi Erbolat Dosaev.
Buryndary tekserý nátıjesinde Almaty qalasy men Almaty oblysy Qarasaı aýdanynyń ákimdikteri karerlerdi qazý úshin keminde qashyqtyǵy 500 shaqyrym bolýy tıis sanıtarlyq qorǵaý aımaǵy nazarǵa alynbaǵan.
Turǵyndar qala ákimine júgingennen keıin másele oń sheshimin tapty. Almaty qalasy ákimdiginiń ótinishi boıynsha Almaty oblysynyń ákimdigi karerdiń jumysyn tekserýdi uıymdastyrdy, nátıjesinde qoldanystaǵy zańnama talaptarynyń buzylǵany rastaldy.
Naýryzbaı aýdanymen shekarada karerdi ázirleýmen úsh fırma aınalysty. Qazirgi ýaqytta eki kásiporynnyń jumysy toqtatyldy jáne taratý satysynda tur. Úshinshi kompanıa boıynsha jumystar toqtatyldy.