Jýyrda Almatyda profesor Aıgúl Úlkenbaeva men aǵa oqytýshy Erjan Jámeńkeevtiń jáne shákirtteriniń qatysýymen «MODEL 2.1.5. Dem al» atty shyǵarmashylyq konsert ótti.
Atalǵan keshte «Qazaqstan daýysy» mega jobasynyń fınalısi, ánshi Jaına Tarǵynova men konsertmeıster, ónertaný ǵylymdarynyń magıstri, oqytýshy Qurmet Erjanat ta boı kórsetti. Kórermendi ádemi áserge bólegen shyǵarmashylyq keshtiń negizgi maqsaty – «Qazirgi tańda orta nemese joǵary bilim oshaqtarynan túlep ushqan dombyrashy modeli qandaı bolýy kerek?» degen suraqqa jaýap berý.
Kúıshiler dombyra qulaǵynda oınaýmen ǵana shektelmeı, álemdik deńgeıde óner kórsetý úshin ózge ult mádenıetiniń shedevrlerimen tanysyp, áýezdi ánderin dombyraǵa ıkemdep jańa dombyrashynyń modelin usyndy. Shartty túrde bekitilgen MODEL 2.1.5 sandary da konsert maqsatyn dál aıqyndaı turǵandaı. 2 sany qos ishekti dombyradaǵy kúımen qatar júretin san alýan áýen úlgisi bolsa, 1 sany – A. Úlkenbaevanyń óz úlgisi, ıaǵnı kúımen qatar túrli janrdaǵy shyǵarmalardy oryndap ári úırete alatyn bilikti maman bola alý. 5 sany – shartty san bolyp esepteledi. Bul – búgingi dombyrashy besaspap mýzykant bolýy kerek degen sóz. Boıda qandaı da bir basqa óner bolsa, ony sóndirip almaı qaıta jandandyrý degendi bildiredi. Dombyrashylar sybyzǵy tartyp, jetigende oınap, bas gıtarany shertip, keshke jańa reńk berip otyrdy. Zamanaýı jastardyń ámbebaptyǵy jańa dombyrashy modelin osylaı kórsetti.
Kesh jańa týyndylar, óńdeýler men laıyqtaýlar jáne óte sırek oryndalatyn kúılermen áserli bola tústi. Atap aıtsaq, Ábiken Hasenovtyń 1950 jyly kúıshi Shámshi Elebekovten jazylyp alynǵan «Qosbasar» kúıin konservatorıanyń 3 kýrs stýdenti Bereke Ahmetova shertti. Qojeke Nazarulynyń «Kúı shaqyrtqysyn» Erjan Jámeńkeev oryndasa, konservatorıanyń 2 kýrs stýdenti Berik Satov Jemeneı Borashtyń áni «Daýylpazdy», E. Úsenov «Kerbez sulý» shyǵarmasyn shekti kvartetke Abylhaıyr Saǵymbaev laıyqtasa, dombyrashylar ansambline laıyqtaǵan Turlyhan Aqqalıevtiń týyndysymen A. Úlkenbaeva jáne shákirtteri óner kórsetti. Qazanǵaptyń kúıi «Aqjeleń», halyq áni «Aqdarıǵa», I. Tamarınniń «Kýbınskıı tanes» , O. Súleımenovtyń shyǵarmasy «Batys-shyǵys» , A. Arhıpovskıı «Zolýshka» shyǵarmalary da sahnalandy. Armık Dashcheniń «Malaga» atty shyǵarmasyn Marat Núkeev dombyrashylar ansambline laıyqtap, ıspan týyndysymen qatar, ózbektiń halyq áýenderinen de shashý shashty.
Kesh sońy Eskendir Hasanǵalıevtiń «Janarym» ánimen túıindeldi. Shyǵarmashylyq keshke kelgen árbir kórermen jańashyldyqty sezinip, kóńildi kúıde tarqasty.