2025 jyldyń 15–21 qyrkúıegi aralyǵynda kórikti Almaty qalasynyń týǵan kúni keń aýqymda, dýmandy sharalarǵa toly merekemen atalyp ótti.
Aptalyq mereke barysynda qalada túrli konsertter, kórmeler, baıqaýlar men óner festıválderi uıymdastyrylyp, almatylyqtar men qala qonaqtaryna erekshe kóńil-kúı syılady. Osy mádenı tolqynnyń bir bólshegine aınalǵan Yqylas atyndaǵy halyq mýzykalyq aspaptar mýzeıi de 19 qyrkúıek kúni eki birdeı taǵylymdy ári áserli mádenı jobamen erekshe kózge tústi.
Olardyń biri – mýzykalyq talanttarǵa arnalǵan ashyq alań «Open stage» jobasy bolsa, ekinshisi – Qazaqstan halqy Assambleıasynyń qoldaýymen ótken «Bir qala – bir júrek» atty merekelik konserti.
Kúndizgi saǵat 14:00-de bastalǵan «Open stage» jobasy – kásibı sahnaǵa alǵash qadam basqan ónerpazdar úshin de, mýzykaǵa janymen ǵashyq áýesqoılar úshin de taptyrmas múmkindikke aınaldy. Bıyl bul bastama mýzeı sahnasynda qatarynan tórtinshi ret uıymdastyrylyp otyr. Jobanyń negizgi maqsaty – halyqtyq jáne zamanaýı mýzykalyq aspaptardy nasıhattaı otyryp, qala turǵyndary men qonaqtarynyń mýzykalyq ónerge degen yqylasyn oıatý, sondaı-aq kez kelgen talant ıesine úlken sahnada óz ónerin pash etýge jol ashý.
Sahna tórine kásibı mýzykanttarmen qatar, mýzykaǵa hobbı retinde qarasa da, jan-tánimen berilgen áýesqoı oryndaýshylar da shyǵyp, óz ónerlerin ortaǵa saldy. Qatysýshylar dombyra men qobyzdyń kúmbirin, jetigen men sazsyrnaıdyń názik únin kórermenge erekshe oryndaýda jetkize aldy. Sonymen qatar, fortepıano, skrıpka, gıtara sekildi túrli mýzykalyq aspaptarda oryndalǵan áýender ulttyq pen zamanaýılyqty ushtastyrdy. Jas ereksheligine qaramaı, barlyq qatysýshylar kórermenniń ystyq yqylasyna bólenip, árqaısysy óz ónerimen túrli júrekterge jol tapty. Shara sońynda ónerpazdarǵa mýzeı atynan alǵys hattar men estelik syılyqtar tabystalyp, kórermender tarapynan jyly lebizder bildirildi.
Alaıda bul – merekelik kúnniń sharyqtaý shegi ǵana edi. Keshki saǵat 19:00-de shymyldyǵy túrilgen «Bir qala – bir júrek» konserti Almatynyń mádenı baılyǵy men etnostyq áralýandyǵyn pash etken shynaıy óner merekesine aınaldy. Ártúrli etnomádenı birlestikterdiń shyǵarmashylyq ujymdary sahna tórinde óner kórsetip, qazaqtyń dástúrli án-kúılerimen qatar ózge ult ókilderiniń ulttyq bıi men áýenderin tartý etti.
Keshtiń kórkin qyzdyrǵan Grýzın halqynyń jalyndy bıi men orys halyq aspaptarynda oryndalǵan syrly áýender kópshiliktiń esinde biraz ýaqytqa deıin saqtalatyny sózsiz. Sondaı-aq túrik, ýkraın halyqtarynyń yrǵaqty bıleri kópshilik kóńilinen shyǵyp, kórermendi bir sátke ózge elderdiń mádenı keńistigine jeteledi. Olardyń ónerin ulttyq fólklorlyq ansámbl «Parasat» jalǵastyryp, sherter men jetigen syndy kóne aspaptarda oryndalǵan qazaq kúıleri arqyly tyńdarmandy tereń ulttyq rýhpen sýsyndatty.
Bul kesh – túrli ult ókilderiniń óner arqyly úndesip, bir shańyraq astyndaǵy tatýlyq pen dostyqty dáriptegen shynaıy mádenı keshine aınaldy. Qonaqtar ulttyq mýzykanyń áýezine bólenip, etnostardyń mádenı álemine jaqynnan úńilýge múmkindik aldy.
Yqylas atyndaǵy halyq mýzykalyq aspaptar mýzeıiniń osy qos sharasy tek qala kúnin atap ótýmen shektelip qalǵan joq. Ol – ulttyq óner men mádenıetti dáripteýdiń, rýhanı muramyzdy ulyqtaýdyń jarqyn kórinisine aınaldy. Bir jaǵynan, shyǵarmashylyqqa qushtar jandarǵa erkin sahnalyq múmkindik berilse, ekinshi jaǵynan – etnomádenı birlikti, kópultty elimizdiń tatýlyǵyn óner tilimen jetkizýdiń aıqyn úlgisi boldy.
Taǵy bir aıta keterligi – osyndaı mazmundy da maǵynaly is-sharalardy uıymdastyrý, onyń árbir sátine kórkemdik reńk berip, kópshilikke áserli túrde usyný – mýzeı ujymynyń qajyrly eńbeginiń jemisi. Sharanyń sátti ótýine atsalysqan mýzeı qyzmetkerleriniń shynaıy janashyrlyǵy men kásibı sheberligin atap ótý – oryndy ári ádil bolmaq.
Muratova Ádemi Erikqyzy,
Yqylas atyndaǵy halyq mýzykalyq aspaptar
mýzeıiniń ekskýrsıa jetekshisi