26 qyrkúıekte Almatyda halyqaralyq Be WOMAN Asia 2025 forýmy ashyldy. Forým kóshbasshy áıelderdi, kásipkerlerdi, ǵylym, mádenıet, óner jáne ınovasıa ókilderin biriktirdi. İs-shara aımaqtaǵy áıelder kóshbasshylyǵy, genderlik teńdik jáne ornyqty damý taqyryptaryn talqylaýdyń basty alańyna aınaldy.
Óz sózinde QR Mádenıet jáne aqparat mınıstri, Prezıdent janyndaǵy Áıelder isteri jáne otbasylyq-demografıalyq saıasat jónindegi ulttyq komısıanyń tóraǵasy Aıda Balaeva qazaqstandyq áıelderdiń búginde barlyq salada senimdi ilgerilep kele jatqanyn atap ótti. Áıelderdiń saýattylyq deńgeıi – 99,9 paıyz, elimizdegi árbir ekinshi ýnıversıtet stýdenti – qyz, al ǵylym salasynda zertteýshilerdiń 55,7 paıyzy – áıelder. Stýdent qyzdardyń 30 paıyzdan astamy STEM baǵyttaryn tańdaıdy, IT jáne sıfrlyq ekonomıkada 31 paıyz áıel eńbek etedi, al eldegi eń iri tehnopark – Astana Hub-ta ár jetinshi startapty áıelder qurǵan. Sondaı-aq áıelder memlekettik basqarý salasyna da belsendi aralasýda: memlekettik qyzmetshilerdiń qataryndaǵy úlesi 55 paıyzdan asady.
«Qazaq áıelderi zamanaýı, bilimdi ári áleýmettik belsendi. Memleket qoldaýynyń arqasynda olar bıznes, ǵylym, memlekettik basqarý salasynda tabysty eńbek etip, sonymen birge otbasylyq qundylyqtardy saqtap keledi», – dedi Aıda Balaeva.
Almaty qalasy ákiminiń orynbasary Azamat Qaldybekov forýmnyń ońtústik astanada ótýiniń erekshe mánge ıe ekenin aıtty.
«Almaty – Qazaqstannyń júregi, eń iri megapolıs, ǵylym men mádenıettiń ortalyǵy. Ortalyq Azıadaǵy eń iri áıelder kóshbasshylyǵy forýmynyń dál osy jerde ótýi sımvoldyq mánge ıe. Be WOMAN Asia – áıelderdiń ıdeıalary, tájirıbesi men energıasy toǵysatyn, jańa bastamalarǵa serpin beretin alań», – dedi ol.
Be WOMAN Asia forýmy halyqaralyq yntymaqtastyq pen tájirıbe almasýdyń bedeldi alańy retinde tanyldy. Ótken jyly ol 12 elden kelgen 95-ten astam spıkerdi jáne 3 myńnan asa kásipker men pikir kóshbasshylaryn jınady. 2025 jyly Almaty taǵy da áıelder kóshbasshylyǵy ortalyǵy mártebesin rastady, álemniń túkpir-túkpirinen kelgen qatysýshylardy jańa ıdeıalar men jobalardy júzege asyrý úshin biriktirdi.
Aıta keteıik, Qazaqstanda áıelderdiń quqyqtaryn qorǵaýǵa baǵyttalǵan birqatar progresıvti zańdar qabyldandy. Sonyń ishinde otbasylyq-turmystyq zorlyq-zombylyq pen qysym kórsetýge qarsy zańdar. Prezıdent tapsyrmasymen İİM-de arnaıy basqarma qurylyp, jynystyq qylmystardy tergeıtin áıel-tergeýshiler tájirıbesi engizildi. Bul sharalar qoǵamda áıelderdiń qaýipsizdigi men quqyqtaryn qorǵaýǵa yqpal etýde.