Jumys sapary barysynda Darhan Satybaldy Medeý aýdanynda ornalasqan jáne 590 nysandy jylýmen qamtamasyz etetin Ońtústik-SHyǵys aýdandyq qazandyǵynyń aldaǵy qysqa daıyndyǵymen tanysty. Negizgi otyn túri – tabıǵı gaz, qýaty – 208 Gkal/saǵ.
Budan keıin Almaty ákimi JEO-2-ge bardy. Bul nysan qalanyń eń iri jylý kózi. Onyń qýaty – 1411 Gkal/saǵ. Jylýdyń úzdiksiz berilýin 664 qyzmetker qamtamasyz etedi. Búgingi tańda kásiporynda jóndeý jumystary aıaqtalýǵa jaqyn, daıyndyq deńgeıi shamamen 80%. JEO-2 ókilderi barlyq jumys ýaqytynda aıaqtalatynyna sendirdi.
Sonymen qatar Darhan Satybaldy JEO-1-diń jumysymen tanysty. Búgingi kúni nysan tolyqtaı gazben jumys isteıdi. Onyń qýaty – 1203 Gkal/saǵ. Kásiporyn qalanyń ortalyq jáne shyǵys bóligin jylýmen qamtamasyz etedi. Munda 357 adam eńbek etedi. Jylýmen qamtamasyz etý nysanyndaǵy jóndeý jumystarynyń basym bóligi aıaqtalǵan, tolyqtaı aıaqtalý merzimi – 30 qyrkúıek. Osydan keıin JEO-1 qys mezgiline tolyq daıyn bolady.
Almaty qalasynyń ákimi aldaǵy jylý berý maýsymyna daıyndyq jumystaryn qatań baqylaýda ustap, belgilengen merzimdi saqtaýdy tapsyrdy.