2025 jyldyń 14 naýryzynda «Almaty Polytechnic College» bazasynda Almaty qalasynyń 1-2 kýrs kolej stýdentteri arasynda qalalyq «XXI ǵasyr kóshbasshysy» ıntellektýaldy oıyny ótti, dep habarlaıdy aqshamnews.kz
İs-shara Almaty qalasy Bilim basqarmasynyń «Jumysshy mamandyqtar jyly-2025» medıa jospary aıasynda uıymdastyryldy. Bilim saıysynyń negizgi maqsaty – bilim alýshylardyń tanymdyq qyzyǵýshylyǵyn arttyrý, kóshbasshylyq qasıetterin anyqtaý, óz elin, tilin, Otanyn qurmetteıtin patrıottyq tárbıe qalyptastyrý.
Oıynǵa Almaty qalasyndaǵy 17 kolejden stýdentter qatysty. Qatysýshylardyń bilim deńgeıin baǵalaý úshin qazylar alqasy arnaıy shaqyryldy. Qazylar quramynda Oqý-aǵartý mınıstrliginiń respýblıkalyq ǵylymı pedagogıkalyq qyzmetkeri, tarıhshy Akaeva Galıa Atıbaevna, «Órleý» BAUO» AQF Almaty qalasy boıynsha kásibı damý ınstıtýtynyń aǵa oqytýshysy, geografıa ǵylymdarynyń magıstri Sabıhanova Asel Kaırbekovna, Qazaq Ulttyq qyzdar pedagogıkalyq ýnıversıtetiniń saıası ǵylymdarynyń kandıdaty, qoǵamdyq gýmanıtarlyq pánder kafedrasynyń dosenti Isaev Ablazız Ýkıbaevıch, №202 mektep-gımnazıanyń orys tili mamany Bekjanova Janat Ismaılovna jáne «Almaty Polytechnic College» aǵylshyn tili mamany Toqtarbaı Madına Aıdarhanqyzy boldy.
Intellektýaldy oıyn 6 kezeńnen turdy: «Báıge» kezeńinde qatysýshylar suraqtarǵa jaýap berip, bilimderi men jyldamdyqtaryn synady, «Polıglot» kezeńinde kóp tildi meńgerý deńgeıin kórsetti, «Kókpar» kezeńinde logıkalyq jáne tanymdyq suraqtarǵa jaýap berdi, «Eger men... bolsam» kezeńinde kóshbasshylyq qabiletterin tanytty, «Sheshendik óner» kezeńinde oıyn júıeli jetkizý qabiletterin kórsetti, al «Jorǵa» kezeńinde jyldam oılaý jáne bilim deńgeılerin dáleldeýge múmkindik aldy. Qatysýshylar tarıh, geografıa, fılosofıa, quqyqtaný, saıasattaný jáne mádenıettaný pánderine qatysty suraqtarǵa jaýap berip, óz oılarynyń ushqyrlyǵyn, shyǵarmashylyq qabiletterin, sheshendik ónerin jáne tabandylyq qasıetterin kórsete bildi. Saıys nátıjeleri ádil baǵalanyp, júldegerler anyqtaldy.
Jeńimpazdar qatary kelesideı anyqtaldy: bas júlde – «XXI ǵasyr kóshbasshysy» ataǵyn Joǵarǵy medısına kolejiniń 2-kýrs stýdenti Maratqyzy Nazgúl ıelendi, jetekshisi – Týrlybaeva Gúlnur. Birinshi oryndy «Almaty Polytechnic College» 2-kýrs stýdenti İzbasar Aıym ıelense, onyń jetekshisi – Baıseıtova Álıa. Ekinshi oryn №2 Almaty gýmanıtarlyq-pedagogıkalyq kolejiniń 2-kýrs stýdenti Ibraeva Arýnaǵa buıyrdy, jetekshisi – Batyrhanova Ǵazıza. Al úshinshi orynǵa Almaty qurylys-tehnıkalyq kolejiniń 1-kýrs stýdenti Beısenqyzy Juldyz laıyq dep tanyldy, jetekshisi – Tólegen Ánıpa.
Jeńimpazdardy shyn júrekten quttyqtaımyz! Bul ıntellektýaldy oıyn jastardyń bilimin shyńdap, kóshbasshylyq qasıetterin damytýǵa zor múmkindik berdi. Barlyq qatysýshylarǵa aldaǵy ýaqytta sáttilik tileımiz!