Sondaı-aq akademıalyq kredıtter eseptelýi múmkin.
Qazaqstanda volonter stýdentterdi materıaldyq yntalandyrý júıesi engizildi. Endi volonterlik qyzmetpen belsendi aınalysatyn bilim alýshylar atqarǵan eńbegi úshin aqshalaı syıaqy ala bastaıdy, dep habarlaıdy Almaty-akshamy.kz QR Bilim jáne ǵylym mınıstrligine silteme jasap.
Bul sheshim áleýmettik mańyzdy qyzmetpen aınalysatyn belsendi stýdentterdiń sanyn kóbeıtý maqsatynda qabyldanyp otyr. Mysaly, muqtaj adamdarǵa kómek kórsetip júrgen, túrli áleýmettik jobalardy júzege asyratyn stýdentter az emes.
«Mınıstrlik jastar bastamalaryna erekshe den qoıyp, olardy qoldaıdy. Máselen, endi 20 saǵattyq volonterlik qyzmet úshin stýdentterge vaýcher túrinde kredıt beriledi. Bul stýdent oqıtyn joǵary oqý ornynda/bilim berý uıymynda eki akademıalyq kredıtti (saǵatty) esepke alýǵa múmkindik beredi. Sondaı-aq stýdent 20 000 teńge mólsherinde birjolǵy aqshalaı tólem alady. Eger stýdent 50 saǵat jumys istese, oǵan bes akademıalyq kredıt (saǵat) eseptelip, 50 000 teńge tólenedi», – dedi QR BǴM «Qarjy ortalyǵy» AQ basqarma tóraǵasy Asqar Ibraımov.
Aıta keteıik, volonter stýdentterge arnalǵan tólemder tilderdi oqytý jáne kompúterlik saýattylyq boıynsha repetıtorlyq qyzmet úshin, erekshe bilim berý qajettiligi bar balalarmen jumys, sonymen birge aýla jáne sport klýbtaryn uıymdastyrǵany úshin, balalar, qarttar jáne múmkindigi shekteýli adamdarmen júrgizilgen áleýmettik jumys, qorshaǵan ortany qorǵaý jáne basqa da qyzmetter úshin qarastyrylǵan. Volonter-stýdentterdi kótermeleý júıesin engizý – jastar arasynda áleýmettik jaýapkershilikti damytý jáne Qazaqstanda volonterler qozǵalysyn ilgeriletý barysynda jańa serpin bolmaq.