Qazaqstan Prezıdentiniń berik ustanymynyń arqasynda qysqa merzimde eldegi jaǵdaıdy baqylaýǵa alýǵa, zańdylyq pen tártipti qalpyna keltirýge múmkin boldy. Bul týraly Qazaqstan basshysy Qasym-Jomart Toqaevpen kelissózderden keıingi birlesken málimdemede RF Prezıdenti Vladımır Pýtın aıtty, dep habarlaıdy Almaty-akshamy.kz QazAqparatqa silteme jasap.
«Qazaqstandaǵy qańtar oqıǵasynan keıin kózbe-kóz alǵash júzdesip otyrmyz. Atalǵan oqıǵa memlekettiń egemendigine, tutastyǵyna jáne turaqtylyǵyna budan buryn bolyp kórmegen syn-qaterdi tóndirdi. Shyn máninde, Qazaqstan lańkestik ozbyrlyqqa tap boldy, bul agresıa ishki ári syrtqy destrýktıvti kúshterdiń tikeleı qatysýymen jasaldy», - dedi V. Pýtın.
Osy oraıda ol Qazaqstan Prezıdenti Qasym-Jomart Toqaevtyń berik ustanymynyń arqasynda qysqa merzimde jaǵdaıdy baqylaýǵa alýǵa, zańdylyq pen tártipti qalpyna keltirýge, qazaq jerine beıbitshilikti qaıtarýǵa múmkin bolǵanyn jetkizdi.
Sonymen qatar V. Pýtın Ujymdyq qaýipsizdik týraly shart uıymy (UQSHU) syn-qaterge tıimdi áreket etýge, múshe memleketterdiń qaýipsizdigi men múddelerin qorǵaý úshin bitimgerlik kúshterdi jumyldyrýǵa qaýqarly ekenin kórsetkenin atap ótti.
Budan buryn habarlanǵandaı, búgin Máskeýde Qazaqstan Prezıdenti Qasym-Jomart Toqaev pen Reseı Prezıdenti Vladımır Pýtın joǵary deńgeıde kelissóz júrgizdi.
Sapar aıasynda birqatar qujatqa qol qoıyldy.