Almatyda Freedom Holding Corp. qoldaýymen İİM ákimshilik polısıa komıtetiniń, Q-88 Qazaqstan ýrbanıster qaýymdastyǵynyń jáne Sergek Group kompanıasynyń uıymdastyrýymen “Vision Zero Almaty” forýmy ótti.
Statısıkaǵa sáıkes 2015-2022 jydary aralyǵynda elde ortasha eseppen jylyna 16 myń jol-kólik oqıǵasy oryn alady, onda eki myńnan astam adam qaıtys bolyp, 18 myńnan astam adam jaraqat alady, dep habarlaıdy Almaty-akshamy.kz Polisia.kz-ke silteme jasap.
«Adamnyń ómirin saqtap qalý úshin jaǵdaı jasaý qajet nemese qarapaıym sózben aıtqanda – qatelikti keshiretin joldar qajet. Jol ınfraqurylymyn damytýmen qatar zańnamany jáne baqylaý men qadaǵalaýdy júzege asyrý baǵyttaryn ózgertý kerek. Biz Parlament Májilisine ortasha jyldamdyq túsinigi, ony esepteý tártibi men jyldamdyq asyrǵandyǵy úshin jaýapkershilikke tartý boıynsha zańnama usynystaryn ázirlep, engizdik», – dedi İİM ákimshilik polısıa komıtetiniń tóraǵasy Qaısar Sultanbaev.
Sonymen qatar forýmda elektrosamokattar men mopedter júrisi, zańsyz avtotasymaldaýshylar máselesi, elimizdegi avtoturaqtar sanynyń qarqyndy ósýi talqylandy. Avtokólikterdiń tehnıkalyq jaǵdaıyna tıisinshe baqylaý júrgizilmeıtini de eskertildi. Osy atalǵan barlyq faktorlar kólik tártibiniń tómen bolýymen qıyndaı túsedi. Aǵymdaǵy jyldyń 10 aıynda 7 mln-nan astam jol júrisi qaǵıdasyn buzý faktisi anyqtalyp, shamamen 19 myń “mas” júrgizýshi ustalǵan, sot sheshimi boıynsha 12,5 myń júrgizýshi júrgizý quqyǵynan aıyrylǵan, 19 myń adam ákimshilik qamaýǵa alynǵan.
«Balalardyń qatysýymen 2023 jyldyń 10 aıynda 3 059 jol-kólik oqıǵasy tirkelgen. Eń soraqysy – onda 246 bala qaza taýyp, 3 368 bala jaraqat alǵan. Balalar – bizdiń qoǵamnyń bolashaǵy. Sondyqtan olardy bolýy múmkin qaýipter týraly habardar etý jáne aldyn alý bizdiń basymdyǵymyz bolýy kerek», – dedi İİM ákimshilik polısıa komıtetiniń erekshe tapsyrmalar jónindegi aǵa ınspektory Aqtoty Boranova.
Bizdiń jumysymyz osy baǵytta endi bastalmaq. Biz Qazaqstannyń barlyq jerlerin qamtý úshin jáne qalalarymyzdy qaýipsiz etý úshin kelesi jyly basqa oblystarda ózara is-qımyldy keńeıtýge baǵyttaldyq. “Vision Zero Almaty” forýmy jol qaýipsizdigi salasynda ıdeıalarmen, usynystarmen jáne úzdik tájirıbelermen almasýǵa keremet múmkindik beredi, – dedi Q-88 Qazaqstan ýrbanıster qaýymdastyǵynyń atqarýshy dırektory Madıar Daýrbaev.
Uıymdastyrýshylar jol apattaryndaǵy ólim sany men jaraqattanýyshylar sanyn azaıtý úshin Qazaqstanda Vision Zero shvedtik baǵdarlamasyn engizý boıynsha bastamany usyndy. Ol jyldamdyq rejımin tómendetý, qoǵamdyq kólik júrgizýshilerin oqytý baǵyttaryn ózgertý jáne trafıkti retteý jónindegi ártúrli sharalardan turady.