Vengrıa elshiligi Qazaqstan Respýblıkasy UQK-niń burynǵy basshysy Kárim Másimovtiń tólqujatyna qatysty túsinikteme berdi, dep habarlaıdy Almaty-akshamy.kz orda.kz-ke silteme jaksap.
Qarasha aıynyń birinshi jartysynda Samarqandta ótken Túrki keńesiniń samıti barysynda Memleket basshysy Qasym-Jomart Toqaev Vengrıa premer-mınıstri Vıktor Orbanmen kezdesti. Aqordanyń habarlaýynsha, memleket basshylary ádettegideı eki jaqty qarym-qatynastar, ekonomıkalyq yntymaqtastyq jáne Aýǵanstan máselelerin talqylady.
Alaıda keıbir BAQ Orbannyń Toqaevqa Kárim Másimov pen onyń otbasy músheleriniń Vengrıa azamattyǵy bar ekenin aıtqany týraly, árıne, óz derekkózderine silteme jasap, múldem basqa aqparat jarıalady.
Bul aqparat esh jerde resmı rastalmaǵandyqtan, Orda.kz redaksıasy túsinikteme alý úshin Vengrıanyń Qazaqstandaǵy Bas konsýldyǵyna júgingen. Dıplomatıalyq departament Másimovtiń eshqashan Vengrıa azamaty bolmaǵanyn aıtty.
2022 jyldyń 6 qańtarynda Kárim Másimov qyzmetinen bosatylyp, ornyna Ermek Saǵymbaev taǵaıyndaldy. 8 qańtarda UQK baspasóz qyzmeti Másimov pen onyń orynbasarlarynyń ustalǵany týraly habarlady.
UQK málimetinshe, Másimov pen Sadyqulovtyń áreketi QR Qylmystyq kodeksiniń 175-babynyń 1-bóligi «Memleketke opasyzdyq», 179-babynyń 3-bóligi «Bılikti kúshtep basyp alý» jáne 362-baby 4-bóliginiń 3-tarmaǵy «Bılikti jáne laýazymdyq ókilettikterdi asyra paıdalaný» boıynsha saraptalǵan.
18 qarashada Astananyń qylmystyq ister jónindegi mamandandyrylǵan aýdanaralyq sotynda UQK-niń burynǵy basshysy Kárim Másimov pen onyń orynbasarlaryna qatysty sot prosesi bastaldy. Onyń isi qupıa. UQK eks-basshysynyń soty jabyq esik jaǵdaıynda ótip jatyr. İstiń jaı-japsary Parlament tıisti sheshim shyǵarsa ǵana qupıalyqtan shyǵarylady.