Velosıpedshige qandaı jaǵdaıda aıyppul salynady – jol erejesiniń negizgi talaptary
Qazaqstandaǵy velosıpedke qatysty jol erejesiniń negizgi talaptaryn nazarlaryńyzǵa usynamyz.
Bir qatarmen júrý kerek
Qazaqstanda velosıped pen moped úshin ortaq ereje bar. Bir aıyrmashylyǵy, mopedke 16 jasqa tolǵan adamdar ǵana mine alady. Al velosıpedshige ondaı talap qoıylmaıdy.
Erejege sáıkes, velosıped úshin arnaıy jol bolmasa, joldyń oń jaǵymen júrýge bolady. Jol jıegimen de júrýge ruqsat. Biraq jaıaý júrginshilerge kedergi keltirmeý kerek.
Velosıped mingen adamdar bir qatarmen júrýge tıis. Al velosıpedshiler kóp bolǵan jaǵdaıda on adamǵa bólinip, toppen qozǵalǵan jón. Sosyn bir-birinen basyp ozýdy jeńildetý úshin toptardyń araqashyqtyǵy 80-100 m bolýy shart.
Velosıpedshiniń mindetteri
Jol júrý erejesiniń 24-babyna sáıkes, velosıped pen moped júrgizýshilerine birneshe talapty qatań saqtaýy qajet. Ony buzǵan jaǵdaıda aıyppul salynady. Negizgi shekteýler:
- rúlden ustamaı júrýge;
- jolaýshy tasymaldaýǵa;
- uzyndyǵynan nemese eni jaǵynan 0,5 metrge artyq shyǵyp turatyn júkterdi nemese basqarýǵa kedergi keltiretin júkterdi tasymaldaýǵa;
- velosıped jolaǵy bolǵanda jolmen júrýge;
- bir jol jolaǵynan artyq bolǵanda solǵa burylýǵa nemese keri burylýǵa;
- avtomagıstralmen júrýge tyıym salynady.
Sondaı-aq velosıped jolaǵy men jol qıylysqan jerde baǵdarsham bolmasa, kólikke jol berý kerek.
Aıyppuldyń kólemi qandaı
Qazaqstannyń zańnamasy boıynsha velosıpedshiler Ákimshilik quqyq buzýshylyq týraly kodekstiń 615-baby (Jaıaý júrginshilerdiń jáne jol júrisine ózge de qatysýshylardyń jol júrisi qaǵıdalaryn buzýy) boıynsha jaýap beredi. Jol erejesin buzǵany úshin 2 AEK (6 900 teńge) kóleminde aıyppul qarastyrylǵan. Al jábirlenýshiniń densaýlyǵyna zıan nemese materıaldyq zalal kelgen jaǵdaıda 10 AEK (34 500 teńge) tóleýge týra keledi.
Tártip buzýshylyq bir jyldyń ishinde qaıtalansa, 2 AEK bes esege ósedi. Al materıaldyq zalal kelgen nemese jábirlenýshi jeńil jaraqat alǵan jaǵdaıda 20 AEK (69 000 teńge) kóleminde aıyppul salynady. Velojolaq bar jerde trotýarmen júrgeni úshin jaza qarastyrylǵan.
Velosıpedshi júrgizýshi ekenin umytpaý kerek
Polıseıler mańyzdy bir máseleni umytpaýǵa keńes berip otyr. Jol erejesine sáıkes, velosıpedke mingen adam júrgizýshi bolyp sanalady. Al velosıpedti ustap kele jatsa, jaıaý júrginshilerge jatady. Soǵan qaraı ákimshilik jaza da qoldanylady.
"Jolda abaı bolyńyzdar! Tyıym salynǵan jerden ótýge bolmaıdy. Joldy tek jaıaý júrginshiler jolaǵymen kesip ótińiz. Ol kezde velosıpedten túsý kerek. Sosyn velosıpedke sham men katafot ornatyp qoıǵan durys. Sonda qarańǵy túskende jolda kele jatqanyńyz alystan kórinedi", - deıdi tártip saqshylary.
Aıta keteri, Ákimshilik quqyq buzýshylyq týraly kodekstiń 28-baby boıynsha 16 jasqa tolǵan jáne aqyl-esi durys adamdar jaýapqa tartylady.