Budan bylaı vandalızm jasaǵandar 600 saǵatqa deıin qoǵamdyq jumysqa tartylady.
Búgin Májiliste vandalızmge qatysty jaýapkershilikti qatańdatý boıynsha zań qabyldandy. Memleket basshysy Ulttyq quryltaıda osy tártip buzýshylyqpen kúresý qajettigi týraly aıtqan bolatyn. Jańa zańdaǵy baptyń ekinshi bóligi boıynsha, 200-den 500 aılyq eseptik kórsetkishke deıin aıyppul salý nemese túzeý jumystary, 300 saǵattan 600 saǵatqa deıin qoǵamdyq jumystarǵa tartý nemese 3 jylǵa deıin bas bostandyǵyn shekteý, ne bolmasa dál sol merzimge bas bostandyǵynan aıyrý jazasy qoldanylmaq, dep habarlaıdy Almaty-akshamy.kz.
Marat Bashımov, QR Parlamenti Májilisiniń depýtaty:
Keıbir azamattar qoǵamdyq oryndardy qalaı lastap júrdi áli de solaı jalǵastyryp jatyr. Sol sebepti de, depýtattar zańǵa birqatar ózgerister engizdi. Bul zań jobasy zań buzýshylyqtardyń aldyn alýǵa jáne ony anyqtaýǵa oń yqpal etedi dep esepteımiz.
Komýnaldyq qaldyqtardy tastaǵany úshin 10 aek aıyppul salynady
Sondaı-aq, endi belgilenbegen jerde komýnaldyq qaldyqtardy tastaǵany úshin 10 aılyq eseptik kórsetkishte aıyppul salynady. Iaǵnı, «ortaq paıdalanylatyn oryndardy lastaý» baby boıynsha zańbuzýshylyqtar úshin jaza eki esege ulǵaıtyldy. Saıabaqtardy, skverlerdi lastaǵany, onyń ishinde belgilenbegen jerlerge komýnaldyq qaldyqtardy tastaǵany úshin 10 aılyq eseptik kórsetkishte aıyppul salynady, al bir jyl ishinde ekinshi ret qaıtalaǵansa aıyppul da eki eselenedi.