Qazaqstan boıynsha ekpe alǵan azamattardyń basym kópshiligi Reseıdiń «Spýtnık V» vaksınasyn tańdaǵan.
Mamandardyń aıtýynsha, kúnnen kúnge órship, túrlenip, mýtasıaǵa ushyrap, jańa shtamdary paıda bolyp jatqan vırýspen kúresýdiń eń tıimdi joly bireý ǵana, bul – jappaı vaksına alý, dep habarlaıdy Almaty-akshamy.kz.
Búkil álemniń Covid-19 koronavırýstyq ınfeksıasymen kúresip kele jatqanyna bir jarym jyldaı ýaqyt bolddy. Jer betindegi adamzattyń densaýlyǵyna osy indetten tóngen qaýip kúni búgin seıiler emes. Dúnıejúzin jaılaǵan indetten qanshama adam ajal qushty? Ǵalymdar der kezinde vırýsqa qarsy vaksına oılap tappaǵanda, bul indettiń saldary qandaı bolatynyn tipti elestetýdiń ózi qıyn.
Mamandardyń aıtýynsha, adamdar betperde taǵyp, áleýmettik qashyqtyqty saqtap, qansha oqshaýlanǵanymen, ekpe almasa, vırýstan júz paıyz saqtaný múmkin emes. Sondyqtan da álemdegi medısına salasynyń qyzmetkerleri, ǵalymdar halyqty jappaı vaksına alýǵa shaqyrady.
Qazaqstan Respýblıkasynyń Prezıdenti Qasym-Jomart Toqaev barsha qazaqstandyqtardy vaksına alýǵa shaqyrady. Memleket basshysy antıvakserlerdiń sózine ermeı, ǵylymnyń jetistigine senýdiń mańyzyn atap ótti.
«Ekpe alý – ár adamnyń azamattyq paryzy», dedi Prezıdent.
Qazirgi tańda Qazaqstanda erikti túrde vaksına alýshylardyń sany alǵashqy kezeńdermen salystyrǵanda áldeqaıda artty. Qazaqstandyqtarǵa ekpe bıylǵy jyldyń 1 aqpanynan bastap salyna bastaǵan bolatyn.
Sońǵy málemitter boıynsha, búgingi tańda Qazaqstanda 4 241 859 adam COVID-19-ǵa qarsy vaksınanyń alǵashqy dozasyn aldy. Respýblıkanyń 2 389 756 azamaty tolyq ımmýndaýdan ótken. Elimiz boıynsha ekpe alǵan azamattardyń basym kópshiligi Reseıdiń «Spýtnık V» vaksınasyn tańdaǵan. Qazir osy vaksınamen álemde 5 mıllıonnan astam adam egildi.
Dúnıejúzilik densaýlyq saqtaý uıymy eń alǵashqy bolyp «Spýtnık V» vaksınasyn koronavırýs ınfeksıasyna qarsy qoldanýǵa ruqsat bergen bolatyn. «Spýtnık V»– aǵzanyń adenovırýstyq platformasyna negizdelgen vaksına. Álem boıynsha alǵashqy tirkelgen Reseı ekpesi dúnıejúzilik densaýlyq saqtaý uıymy tizimindegi vaksınalardyń alǵashqy ondyǵyna engen. Ǵalymdardyń zertteýinshe, "Spýtnık V" vırýstyń jańa shtamdaryna da qarsy tura alady. Osy kúnge deıin ekpe saldyrǵandardyń arasynda vaksınaǵa alergıalyq reaksıa baıqalmaǵan. "Spýtnık V" ekpesi Birikken Arab Ámirlikteri, Úndistan, Venesýela, Ońtústik Koreıa jáne Belarýs sekildi álemniń 67 elinde qoldanylady. "Spýtnık V" - tıimdiligi 90% asatyn álemdegi úsh vaksınanyń biri. Vaksınanyń tıimdiligi 97,3% deńgeıinde.
Taıaýda brıtandyq Nature jýrnalynda "Spýtnık V" koronavırýsyna qarsy reseılik vaksına týraly materıal jaryq kórdi. Maqalada "Spýtnık V" vaksınasynyń qaýipsiz jáne tıimdi ekenine jan-jaqty sholý jasalǵan. Sheteldik bedeldi basylym vaksınanyń álemdi jaılaǵan indetpen kúresýde alatyn orny erekshe ekenin jazdy.
QR DSM Ulttyq ftızıopýlmonologıa ǵylymı ortalyǵy dırektorynyń klınıkalyq jáne ǵylymı jumystar jónindegi orynbasary Lázzat Eralıeva vaksına koronavırýstyq ınfeksıanyń damýyna túrtki bolmaıtynyn, sondaı-aq sozylmaly aýrýlardyń órshýine alyp kelmeıtinin aıtady.
"Vaksına koronavırýs aqýyzynyń belgili bir túrine antıdeneler shyǵarýǵa baǵyttalǵan. Qazaqstanda qazir úsh vaksına bar. KazVac jáne Hayat-Vax-belsendi emes vaksınalar, olardyń quramynda «óltirilgen» vırýs bar, sondyqtan bul vaksınalar adamnyń jaǵdaıyn nasharlata almaıdy. "Spýtnık V" - vektorlyq vaksına jáne koronavırýs aqýyzynyń tasymaldaýshylary adenovırýstar. Sondyqtan vaksınasıadan keıin tumaýǵa uqsas sındrom bolýy múmkin. Biraq bul adamnyń densaýlyǵyna qaýipti emes, qaıta aǵzanyń vırýsqa tózimdiligin arttyryp, qarsy ımýnıtet qalyptastyrady, – deıdi maman.