Osyndaı oı aıtqan Májilis tóraǵasy Erlan Qoshanov 2026-28 jyldarǵa arnalǵan respýblıkalyq búdjettiń basty artyqshylyǵyn atady, - dep habarlaıdy Aqshamnews.kz.
- Búdjet jobasy uzaq jyldan beri alǵash ret Ulttyq qordan qosymsha nysanaly transferttersiz ázirlenip otyr. Bul - tolyqqandy, Ulttyq qordyń qoldaýyna súıenbegen búdjet qabyldadyq degen sóz. Mundaı nátıje Memleket basshysynyń qarjy-búdjet júıesin jetildirý jóninde bergen tapsyrmasyn kezeń-kezeńimen iske asyrýdyń arqasynda múmkin bolyp otyr, - dedi palata spıkeri.
Onyń sózinshe, búdjettiń áleýmettik baǵdary saqtalyp otyr.
- Halyqqa qoldaý kórsetý basymdyq bolyp qala beredi. Mektepter men aýrýhanalar, mádenıet pen sport nysandaryn salý men rekonstrýksıalaýǵa qomaqty qarjy baǵyttalady. Budan bólek, ekonomıkanyń naqty sektoryn qoldaý sharalary ulǵaıtylady. Onyń ishinde óńirlerdegi jańa ınvestısıalyq jobalar úshin «Báıterek» holdıńiniń qaıtarymdy qarjylandyrýy arqyly da qoldaý kórsetiledi. Ol turaqty ekonomıkalyq ósim men jumyspen qamtýǵa jol ashady, - dedi Erlan Qoshanov.
Májilis tóraǵasy úsh jyldyq búdjet jobasynda óńirlerdi qarjylandyrý boıynsha másele bar ekenin aıtady.
- Búginde salyq túsimderiniń bir bóligin jergilikti deńgeıge berý zańnamalyq túrde bekitildi. Bul tásil qazirdiń ózinde oń nátıje bere bastady. Kóptegen oblysta kirister josparyn artyǵymen oryndaý baıqalýda. Jergilikti búdjetter qarjylyq mindetterdi sheshýde ornyqty ári derbes bola tústi. Osy rette, paıda bolǵan qosymsha qarajat túrli ımıjdik bastamalarǵa emes, bastalǵan jobalardy aıaqtaýǵa jáne áleýmettik mańyzy bar jobalarǵa baǵyttalýy qajet. Úkimet pen depýtattar osy prosesti qadaǵalaýǵa tıis, - dedi Májilis spıkeri.