Bıyl Asqar Toqpanov atyndaǵy oblystyq qazaq drama teatrynyń 90 jyldyǵy jáne qazaqtyń tuńǵysh kásibı rejıseri, ustaz, uly tulǵa - Asqar Toqpanovtyń 110 jyldyq mereıtoıy atalyp ótýde.
Osyǵan oraı Tarazda respýblıkalyq teatr festıvali saltanatty túrde bastaý aldy, - dep habarlaıdy Aqshamnews.kz.
İs-shara bastalmas buryn teatr ujymdary men ártister qyzyl kilemnen ótip, ónerdiń mereıin asyrdy. Shara barysynda qatysýshylar qazaq teatr óneriniń korıfeıi - Asqar Toqpanovtyń eskertkishine taǵzym etip, gúl shoqtaryn qoıdy.
Saltanatty sharada Qazaqstannyń halyq ártisi, teatr jáne kıno óneriniń maıtalmany Asanáli Áshimov, sondaı-aq teatr jáne kıno akteri, Qazaqstan teatr qaıratkerleri odaǵynyń tóraǵasy Tuńǵyshbaı Ál-Tarazı quttyqtaý sóz sóılep, Asqar Toqpanovtyń ustazdyq jáne shyǵarmashylyq bolmysy jaıynda estelikterimen bólisti.
Respýblıkalyq teatr festıvaline elimizdiń ár óńirinen alty teatr qatysýda. Olardyń qatarynda S.Qojamqulov atyndaǵy Ulytaý teatry, Atyraý oblystyq Mahambet atyndaǵy akademıalyq qazaq drama teatry, R.Seıtmetov atyndaǵy Túrkistan teatry, Q.Qojamıarov atyndaǵy Respýblıkalyq memlekettik akademıalyq uıǵyr mýzykalyq komedıa teatry, B.Rımova atyndaǵy Taldyqorǵan drama teatry jáne qonaqjaı Tarazdyń maqtanyshy – Asqar Toqpanov atyndaǵy oblystyq qazaq drama teatry bar.