Avtokólik jáne aýyl sharýashylyǵy tehnıkasyna kádege jaratý alymy 50 paıyzǵa deıin tómendetiledi. Bul týraly QR Premer-Mınıstriniń birinshi orynbasary Roman Sklár málim etti, dep habarlaıdy Almaty-akshamy.kz
«Atameken» alańynda pikirtalastyń 4-5 raýndyn ótkizdik. Olardy Ekologıa, geologıa jáne tabıǵı resýrstar, Indýstrıa jáne ınfraqurylymdyq damý mınıstrlikteri, sarapshylyq qaýymdastyqtar uıymdastyrdy. Naǵyz sarapshylar, ótirik sarashylar, avtoóndirýshiler - bári-bári qatysty. Árıne, pikir óte kóp. Elimizge sheteldik eski-qusqy kólikterdi kirgizý úshin ýtıldik alymdy múldem alyp tastaý máselesi de kóterildi. Otandyq mashına jasaý salasyna nuqsan keltirýge tyrysqandar da boldy», - dedi Roman Sklár «Habar-24» telearnasyndaǵy «Suhbat» baǵdarlamasy barysynda.
Degenmen, ol ýtıldik alymǵa qatysty teńgerimdi sheshim qabyldanǵanyn atap ótti.
«Avtoónerkásipti yntalandyrý deńgeıi jalpy bizge kóliktiń barlyq túrine jáne qurastyrylatyn aýyl sharýashylyǵy tehnıkasyna kádege jaratý alymy 50 paıyzǵa deıin tómendetýge múmkindik beredi», - dedi birinshi vıse-premer.
Esterińizge sala ketsek, Memleket basshysy Qasym-Jomart Toqaev taıaýda Úkimettiń keńeıtilgen otyrysynda ýtıldik alym tóńiregindegi daýǵa qatysty pikir bildirgen bolatyn.
«Qazaqstanda halyqaralyq júk tasymalyna 7,5 myń tirkemeli kólikter jumys isteıdi. Reseıdiń halyqaralyq tasymalynda 34 myń, Belaýr elinde 15 myń, Ózbekstanda 8 myń kólik qatysýda. Otandyq kásiporyndar naryqta ornyn joǵaltýda. Kórshilerimizden utylyp jatyrmyz degen sóz. 2017 jyldan beri otandyq tasymaldaýshylardyń halyqaralyq tasymal naryǵyndaǵy úlesi 1,5 eseden astam qysqarǵan. Sondyqtan Úkimetke bul saladaǵy saıasatty jetildirý, onyń ishinde ýtıldik alym boıynsha usynys daıyndaý kerek», - degen edi Qasym-Jomart Toqaev.