Elimizde «Mektepke deıingi uıymdardyń úzdik pedagogteri» anyqtaldy
Muǵalimder kúni qarsańynda QR Oqý-aǵartý mınıstrliginiń qoldaýymen Balalardy erte damytý ınstıtýty uıymdastyrǵan «Mektepke deıingi uıymnyń úzdik pedagogy» respýblıkalyq baıqaýynyń qorytyndysy shyǵaryldy. Oǵan elimizdiń barlyq óńirlerinen mektepke deıingi bilim berýdiń 227 pedagogy qatysty.
Maqsaty-mektepke deıingi tárbıe men oqytýdy uıymdastyrýda zamanaýı tásilderdi iske asyrý úshin úzdik pedagogıkalyq tájirıbelerdi anyqtaý jáne taratý.
Birinshi týrda qatysýshylar ózderiniń portfolıolaryn usynyp, «Mektep jasyna deıingi balalardy damytý men tárbıeleýdegi Zamanaýı pedagogtyń róli» taqyrybynda esse jazdy, sondaı-aq jumys kúninen beınematerıaldar kórsetti. Ekinshi týrda qatysýshylar ózderiniń oqytý jáne tárbıeleý ádistemesin tanystyrdy.
Baıqaý qorytyndysy boıynsha bas júlde Batys Qazaqstan oblysynan kelgen balabaqsha tárbıeshisi Aıjan Nurseıitovaǵa buıyrdy.
İ oryndy Batys Qazaqstan oblysynyń № 3 «Elochka» balabaqshasynyń tárbıeshisi Z.Orynǵalıeva, Qyzylorda oblysynyń № 19 sanatorıı-balabaqshasynyń tárbıeshisi E. Abdýaıtova jáne Aqmola oblysynyń «Juldyz» balabaqshasynyń dene shynyqtyrý nusqaýshysy A. Ǵabıdýllına ıelendi.
II oryndy Qaraǵandy oblysynyń «Baldyrǵan» arnaıy balabaqshasynyń logoped-muǵalimi E.Degtáreva, Taraz qalasynyń № 8 bóbekjaı-baqshasynyń qazaq tili pedagogy B. Úmbetova, Shyǵys Qazaqstan oblysynyń «Eńlik» bóbekjaı-baqshasynyń mýzykalyq jetekshisi A. Bekshoınova ıelendi.
III orynǵa Qostanaı oblysynyń № 15 bóbekjaı tárbıeshisi T. Kýdrávseva, Jetisý oblysynyń «Araı» balabaqshasynyń tárbıeshisi A.Dýshabaeva, Pavlodar oblysynyń № 8 balabaqshasynyń tárbıeshisi M. Syrymbaeva jáne Ulytaý oblysynyń «Aqerke» bóbekjaıynyń tárbıeshisi S. Ibragımova laıyq dep tanyldy.
Sondaı-aq, jeńimpazdarǵa «Sheber pedagog», «Kreatıvti pedagog», «Ónerli pedagog» jáne «Jańashyl pedagog» arnaıy nomınasıalary tabystaldy.