Almatyda ótken qalalyq semınar – muǵalim bedelin kóterýdiń, sapaly bilimge bastar joldyń jarqyn kórinisi
Búgingi bilim berý júıesi – jaı ǵana oqytý emes, jańa ǵasyrdyń talabyna saı jeke tulǵa qalyptastyrý alańy. Bul – ınovasıalyq tásilderdi, shyǵarmashylyq kózqarasty, kásibı yntymaqtastyqty qajet etetin kúrdeli de jaýapty sala. Mundaı mańyzdy úderiste ustazǵa artylar júk aýyr. Al sol ustaz eńbegi eskerilip, tájirıbesi taratylyp, kásibı sheberligi shyńdalyp otyrsa, bilim sapasy sózsiz ósedi.
2025 jyldyń 25 sáýirinde Almaty qalasy, Naýryzbaı aýdanyndaǵy №208 mektep-gımnazıasynyń qabyrǵasynda ótken «Bilim berý úrdisindegi ozat tájirıbe: ortaq maqsattarǵa jetýdiń kepili» atty qalalyq semınar – osy sózimizdiń aıqyn dáleli.
Bul semınar – bir kúndik jıyn ǵana emes, búgingi bilim salasyndaǵy tyń ıdeıalardyń, zamanaýı kózqarastardyń, ári eń bastysy, muǵalimniń qoǵamdaǵy ornyn aıqyndaıtyn mańyzdy alań. Almaty qalasy Bilim basqarmasy, «Qalalyq bilim berýdegi jańa tehnologıalardyń ǵylymı-ádistemelik ortalyǵy» jáne №208 mektep-gımnazıasynyń birlese uıymdastyrǵan bul shara pedagogter qaýymy úshin úlken serpilis ákeldi.
Kásibı sheberliktiń kókjıegi keńeıdi!
Semınar barysynda ustazdar «Mamandyqtar qalashyǵyna saıahat» arqyly oqýshylardyń kásibı baǵdaryn anyqtaýǵa arnalǵan erekshe jobamen tanysty. «Zertteý jumystary men tájirıbe alańy» alańynda áriptester ǵylymı izdenisterimen bólisip, óz tájirıbelerin ortaǵa saldy. Semınardyń resmı ashylýynan keıin tyńdalǵan mazmundy baıandamalar men úlgili sabaqtar kópshilikti tánti etti. Bul – tájirıbeniń sóz júzinde emes, naqty ispen dáleldengeni.
Jańa ádistemeler, pedagogıkalyq ınovasıalar, teorıa men praktıkany ushtastyrý, kros-pándik baılanystar – bári de qazirgi bilim berý júıesiniń negizgi tirekterine aınalyp otyr. Muǵalimderdiń bul baǵyttaǵy sheberligi men izdenisi semınar barysynda aıqyn kórinis tapty.
Semınar – shabyt pen serpilis alańy!
Búgingi muǵalim – óz pániniń mamany ǵana emes, ol psıholog, baǵyt-baǵdar berýshi, tehnologıany meńgergen jan-jaqty tulǵa. Mundaı talaptar zaman týǵyzyp otyr. Al osy talaptardy ıgerýde pedagogke qoldaý kórsetý – eń basty mindet. Semınar barysynda ustazdar osyndaı qoldaýdy sezinip qana qoımaı, bir-birinen úırenip, ortaq maqsatqa jetýdiń jańa joldaryn ashty.
Dýaldy oqytý elementteri, ata-ana – oqýshy – muǵalim úshtiginiń yntymaqtastyq modeli, fýnksıonaldyq saýattylyqty arttyrý tásilderi – barlyǵy osy semınardyń kún tártibinde qamtyldy. Árbir qatysýshy jańa oımen, tyń ıdeıamen, kásibı shabytpen oraldy.
Ustazdar da úırenýge tıis, úırenýden sharshamaýy tıis!
Qatysýshylardyń keri baılanys sesıasyndaǵy pikirleri – semınardyń sátti ótkeniniń basty dáleli. Muǵalimderdiń aıtýynsha, mundaı mazmundy ári praktıkalyq baǵyttaǵy is-sharalar olardyń kásibı damýyna tyń serpin beredi. Uıymdastyrýshylar men qatysýshylardyń kásibı deńgeıi, shyǵarmashylyq kózqarasy men jańashyldyǵy – kópke úlgi.
Qazir pedagogterge qoıylatyn talap kún sanap artyp keledi. Biraq sonymen birge olarǵa jasalatyn qoldaý men ortaq tájirıbe almasý alańdary da artýy tıis. Bul semınar – dál sondaı múmkindiktiń biri.
Bilim salasyndaǵy ozat tájirıbe – qurǵaq uǵym emes. Ol – naqty is. Ol – kúndelikti izdenis pen toqtaýsyz damý. Al mundaı semınarlar osy úderiske tyń serpin berip, muǵalimdi jańasha oılaýǵa, shabytpen jumys isteýge jeteleıdi.
Semınar – ustazdar qaýymynyń merekesi ispetti. Bul – oı bólisý, ıdeıa almasý, shabyttaný, jigerlený, qaıta túlep, jańarý alańy. Ustaz – ult bolashaǵyn qalyptastyrýshy bolsa, osyndaı basqosýlar sol bolashaqtyń berik irgetasyn qalaıtyn ıgi is.
Adenova Gúlbaǵda,
Almaty qalasy, Naýryzbaı aýdany №208 mektep-gımnazıasynyń dırektory