Almatyda «Air Astananyń operasıalyq qyzmeti: máseleler jáne damý josparlary» atty brıfıń ótti.
Jıyn barysynda Air Astana áýe kompanıasynyń prezıdenti Pıter Foster barlyq basty qyzmetkerlerimen birge búgingi kúni oryn alyp jatqan qıyndyqtardyń sebebin túsindirip, BAQ ókilderiniń suraqtaryna jaýap berdi.
Kompanıa prezıdentiniń aıtýynsha, sońǵy ýaqytta oryn alǵan áýe reısteriniń keshigýi, ushý kestesiniń saqtalmaýy syndy qolaısyzdyqtarǵa ishki jaǵdaıdan bólek, jalpy álemdegi ózgerister áser etýde. Halyqaralyq áýe kóligi qaýymdastyǵynyń málimetinshe, jolaýshylar sanynyń artýy álemdegi eń iri áýejaılarda kólik daǵdarysyna jáne halyqaralyq áýe kompanıalarynyń reısteriniń keshigýine ákeldi. Mundaı jaǵdaıǵa Air Astana-da tap bolǵan, jazdyń alǵashqy eki aıynda ótken jylmen salystyrǵanda, jolaýshylar sany 17%-ǵa artqan. Sondaı-aq, áýe kompanıacynyń ushaqtary iri torapty áýejaılarǵa ushatyndyqtan, halyqaralyq habtardaǵy irkilister kompanıa kestesine áser etken. Jaǵdaıdy ýshyqtyratyn faktorlar qatarynda Qazaqstan áýejaılaryndaǵy ushý-qoný jolaqtaryn jóndeý, qarbalas merzim kezinde áýejaılardyń jabylýy jáne qustarmen soqtyǵysýdyń kóbeıýi syndy sebepter ataldy. Naqty aıtqanda, qustarmen soqtyǵysý sany ótken jylmen salystyrǵan-da 22,3%-ǵa ósken.
Degenmen Air Astana barlyq kináni syrtqa artyp qoımaı, ózderinen ketetin olqylyqtar baryn moıyndady. Áýe kompanıasynyń uqyptylyq kórsetkishi (keste boıynsha ýa-qytyly ushyp-qonýy) 2015-2016 jyldary 92-91% bolsa, odan keıin bul kórsetkish tómendeı bergen. 2018-de 86%, 2020 men 2021-de 85%, bıyl jarty jyldyq kórsetkish boıynsha 74%-dy qurady. Ásirese, jazǵy ýaqytta reısterdiń kestesi jıi buzylǵan. Naýryz aıynda jolaýshylardyń 87% ýaqytyly jolǵa attansa, maýsym men shildede bul kórsetkish 66%-dy ǵana kórsetken.
«Air Astananyń búkil komandasy reısterdi ýaqytyly oryndaý úshin jumys isteıdi. Keshigýler sanyn azaıtý úshin jáne qyzmet kórsetý sapasyn arttyrý úshin biz reıster sanyn qysqartyp, Airbus A320 rezervtik ushaǵyn bóldik. Sondaı-aq, reısterdiń keshigýine baılanysty jedel jeli ashtyq. Jolaýshylar saǵat 8.00-den 24.00-ge deıin +7 (7272) 44-44-78 nómirine habarlasa alady», – dedi Air Astana kompanıalar tobynyń prezıdenti Pıter Foster.
Sonymen qatar, kompanıa basshylyǵy 2022 jyldyń sońyna deıin Air Astana avıa-parki úshin 2 ushaq, FlyArystan floty úshin 3 ushaq satyp alýdy josparlap otyrǵanyn habarlady. 2020 jyldyń ortasynan 2022 jyldyń naýryz aıyna deıin flotty 13 ushaq tolyqtyrǵan. 2025 jylǵa deıin taǵy 24 áýe kemesin alý josparlanǵan.
Brıfıń barysynda elordada quny 10,4 mıllıon AQSH dollaryn quraıtyn ushqyshtar men bortserikterdi oqytý úshin arnaıy jańa oqý ortalyǵy salynatyny aıtyldy.